Малтретирани 205 стари лица во домови за стари лица во Бугарија

СОФИЈА (АА) – Утврдено е дека 205 стари лица биле малтретирани во 5 дома за стари лица во Бугарија, известува Анадолу.

Во соопштението на бугарското Министерство за правда се наведува дека е спроведена операција во 5 дома за стари лица кои обезбедувале нелегални услуги во градовите Стара Загора и Варна.

Во соопштението се наведува дека 205 стари лица биле малтретирани во 5 дома за стари лица.

Споделени се фотографии од старите лица кои биле малтретирани.

На фотографиите се гледаат старите лица, кои биле ослабени поради негрижата, како се врзани за нозете и лежат под креветите.

Министерот за правда, Георги Георгиев, за медиумите изјави дека домовите за стари лица биле претворени во „домови на ужас“.

„Луѓето овде биле дрогирани и потоа врзувани за креветите. Биле малтретирани и измачувани“, рече министерот Георгиев.

Наведувајќи дека некои постари лица биле однесени во болница, а некои биле префрлени на други локации, Георгиев продолжи со зборовите:

„Никој никогаш не видел ваков ужас. Некои од инспекторите излегле плачејќи откако ја виделе ситуацијата“.

Зборувајќи дека постарите лица во домовите за стари лица биле држени во заробеништво и биле сурово третирани, Георгиев истакна:

„Вратите беа заклучени, внатрешните рачки на прозорците тргнати. Хигиенските услови беа одвратни. Немаше постелнина. Телефоните им беа одземени, луѓето немаа врска со надворешниот свет, немаа лични карти. Немале постојана здравствена нега. Лекарот доаѓал само кога некој ќе починел. Неквалификувани луѓе им инјектирале неодредени лекови на старите лица“.

Министерот Георгиев најави дека нелегалните домови за стари лица ќе бидат затворени и дека ќе продолжат строгите контроли.