Лавров во Белград: „Русија ги поддржува сите чекори кон заемно прифатливо решение за прашањето на Косово“

БЕЛГРАД

Ставот на Русија за прашањето на Косово не се менува и денеска уште еднаш потврдивме дека ќе ги поддржиме сите чекори што ќе помогнат да се постигне заемно прифатливо решение, рече рускиот министер за надворешни работи, Сергеј Лавров во Белград, јавува Агенција Анадолија (АА).

„Ставот на Русија за прашањето на Косово не се менува и денеска ние уште еднаш потврдивме дека ќе ги поддржиме сите чекори и иницијативи што навистина ќе им помогнат на Белград и Приштина да постигнат заемно прифатливо решение засновано врз Резолуцијата 1.244 на Советот за безбедност на Обединетите нации“, рече Лавров.

На заедничката прес-конференција со српскиот претседател Александар Вучиќ, Лавров рече дека Русија нема да дозволи никакви рокови за решавање на тоа прашање.

Тој додаде дека Русија исто така започнува од фактот дека ЕУ, која има мандат да биде посредник во дијалогот, не смее да се „изолира“ од своите обврски, а дека решението мора да биде потврдено во Советот за безбедност на ОН.

Лавров исто така рече дека Вучиќ и тој разговарале за регионалните теми, но разговарале и за годишнината од Дејтонскиот договор и истакна дека нема да дозволи настаните на Балканот да бидат релативизирани, ниту оние од времето на Втората светска војна.

Шефот на дипломатијата на Руската Федерација рече дека Србија и Русија соработуваат особено интензивно во областа на енергетиката, како и дека имаат многу успешна воено-техничка соработка и оти Русија високо ја оценила и соработката со Србија во борбата против коронавирусот.

Лавров додаде дека Вучиќ следната недела ќе биде во Москва и дека постои многу активен дијалог меѓу Руската и Српската православна црква во зачувувањето на мирот и традиционалните вредности, чиј симбол на единство е Храмот „Свети Сава“ во Белград.

Претседателот на Србија, Александар Вучиќ, исто така, зборуваше за Косово како клучна тема и наведе дека добил проценки од Лавров за тоа прашање, што „како претседател на Србија го загрижило уште повеќе, во врска со разните планови и идеи за решавање на косовската криза“.

„Не сакам да измамиме никого и очигледно ќе имаме тежок период во кој ќе се соочиме со голем притисок да реализираме некои планови кои не ги добивме официјално или неофицијално, а според нашите руски пријатели, ќе мора да бидеме внимателни во следењето на секоја идеја што ни е претставена“, рече Вучиќ.

Вучиќ се заблагодари на Русија за поддршката во Советот за безбедност на ОН во зачувувањето на нејзиниот територијален интегритет и за фактот дека Русија и Србија ги штитат меѓународните организации и институции од „незаконитост и влијание од оние кои ја признаа независноста на Косово“.

„За секое решение секогаш е потребна и согласност од Русија заради Советот за безбедност на ОН, но исто така и затоа што не сакаме сите да бидат консултирани и прашани, а притоа Русија никој ништо да не ја праша“, рече Вучиќ.

На прашањето дали Србија ќе ја признае независноста на Косово ако добие нешто за возврат, Вучиќ рече: „Ако мислите да кажеме дека Косово треба да влезе во ОН, а ние да не добиеме ништо, туку да ни кажат ’Ќе бидете член на ЕУ‘, нашиот одговор е „не““.

Тој, исто така, оцени дека соработката меѓу двете држави е добра и дека може да биде уште подобра, спомнувајќи тука и воено-техничка соработка, како и заеднички проекти.

Претседателот на Србија, исто така, рече дека побарал поддршка од Русија за Српската православна црква и изрази уверување дека доаѓањето на претседателот Владимир Путин на отворањето на Храмот „Свети Сава“ уште повеќе ќе ја зајакне позицијата на народот, земјата и Српската православна црква.

Претходно, Лавров беше пречекан на белградскиот аеродром „Никола Тесла“ од страна на српскиот министер за надворешни работи, Ивица Дачиќ, со кого Лавров ќе се сретне подоцна во текот на денот, а двајцата ќе положат венци на споменикот „Ослободителите на Белград“ и Меморијалниот комплекс на Црвената армија.

Исто така, Лавров и министерот за внатрешни работи на Србија, Небојша Стефановиќ, денеска ќе потпишат договор меѓу Владата на Србија и Владата на Русија за соработка во борбата против тероризмот.