Курти ја повика Србија да ги отвори воените архиви за да се откријат локациите на масовните гробници

ПРИШТИНА (АА) - Косовскиот премиер Албин Курти ја повика Србија да ги отвори архивите на 37. Моторизирана бригада на Војската на Југославија одговорна за многу масакри во подрачјето на Дреница, пренесува Анадолу.

По повод 10-годишнината од одлуката на Министерството за одбрана на Србија да ги прогласи за државна тајна документите за дејствувањето на 37. Моторизирана бригада на Војската на Југославија во Косово, Курти оцени дека Србија не се оградува од режимот на Слободан Милошевиќ и неговите геноцидни злосторства во Косово.

„Во текот на војната во Косово во 1998-1999 година стратегијата на српската држава беше да го скрие злосторството со криење на труповите. Оваа стратегија и понатаму е активна. Наследниците на Милошевиќ во Белград, некогаш соработници, а сега политичари на чело на српската држава, одбиваат да ги отворат архивите за да се открие каде се наоѓаат масовните гробници“, напиша Курти на Фејсбук.

Тој истакна дека одлуката на Министерството за одбрана на Србија, донесена на 31 јули 2014 година, документите за дејствувањето на 37. Моторизирана бригада на Војската на Југославија во Косово да ги прогласи за државна тајна, го спречува откривањето на болната вистина за убиствата на албанските цивили и криењето на нивните тела во масовни гробници во Србија.

„Врз основа на договорот постигнат на 2 мај минатата година во Брисел, го повторуваме барањето за отворање на архивите во Србија. Веќе упативме неколку барања во врска со отворање на архивата на 37. Моторизирана бригада на ВЈ, одговорна за многу масакри во подрачјето на Дреница“, наведе Курти.

Косовскиот премиер смета дека одлуката на државата Србија да ги класифицира овие документи како тајни во период од 30 години е обид за прикривање на извршените злосторства.

„Тоа, исто така, е јасен показател дека Србија, стоејќи над гробовите на убиените албански цивили, не покажа никаков знак на каење за злосторствата извршени во Косово. Овој чин претставува кршење на човековите права, правото на семејствата да ја дознаат вистината и ги оневозможува напорите за спроведување на правдата. Со чувањето на овие документи во тајност Србија не се оградува од режимот на Милошевиќ и неговите геноцидни злосторства во Косово“, наведе Курти.

На крајот тој порача дека правдата и трајниот мир во регионот може да се постигнат само преку расветлување на вистината и повикување на сторителите на одговорност.

Одлуката на тогашниот министер за одбрана на Србија, Братислав Гашиќ, архивата на 37. Моторизирана бригада на Војската на Југославија да се означи со највисок степен на тајност на податоците на 30 години, се дозна кога Фондот за хуманитарно право (ФХП), врз основа на Законот за слободен пристап до информации од јавно значење, кон средината на јуни 2014 година побара да се достават документите поврзани со активностите на таа бригада во времето на злосторствата опишани во досието „Рудница“.

Во јануари 2015 година ФХП го објави досието „Рудница“ во кое дава увид во доказите за четирите злосторства извршени во април и мај 1999 година во Косово, во зоната на одговорност на 37. Моторизирана бригада на Војската на Југославија со која командуваше сегашниот началник на Генералштабот на Вооружените сили на Србија, Љубиша Диковиќ, каде што се убиени цивили - косовски Албанци, чии тела беа ексхумирани од масовна гробница во Рудница во 2014 година, како и увид во „асанација на боиштата“, во чии рамки телата на жртвите се земени од местото на злосторството и потоа криени 15 години.

Тогаш ФХП посочи дека министерот за одбрана го прекршил Законот за тајност на податоците и дека неговите постапки биле насочени кон оневозможување на расветлување на сите околности околу убиствата на косовските Албанци чии тела се пронајдени во масовната гробница во Рудница.

Во масовната гробница во Рудница, кај Рашка, пронајдени и ексхумирани се 54 тела на косовски Албанци убиени за време на војната во Косово, а потоа пренесени и скриени на територијата на Србија. На територијата на Србија се откриени масовни гробници и во Батајница, Перуќац, Петрово Село и Кижевац. Од тие гробници ексхумирани се речиси 1.000 тела, меѓу кои и на деца и жени.

Во Косово сè уште се трага по над 1.600 лица што исчезнаа во војната 1998/1999 година, најголем дел од албанската заедница.