ПРИШТИНА (АА) - По состанокот на Националниот совет за безбедност на Косово, премиерот Албин Курти изјави дека нападите врз Косовската полиција и припадниците на ЕУЛЕКС се неприфатливи. Тој на вонредна прес-конференција рече дека чека КФОР да ги отстрани барикадите од патиштата, ако не го направат тоа самите Срби кои ги поставија, јавува Агенција Анадолија (АА).
Курти истакна дека на состанокот на Националниот совет за безбедност се разговарало за најновата ситуација на северот и била изразена подготвеност за поголема будност на сите институции на Косово со цел да се овозможи воспоставување мир, безбедност, законитост и уставност.
Курти изјави дека Србија со нејзиното раководство му се заканува на Косово со војна и по 23 години од завршувањето на војната.
„Србија не крие дека сака да се врати на Косово, во суштина продолжува да бара војна, војна која ја загуби и прифати капитулација тогаш во Куманово на 9 јуни 1999 година. Оттука, негирањето на државата Косово и на нашето осамостојување од Србија претставува постојана закана не само за нашата земја, туку и за нашата егзистeнција“, нагласи Курти.
Тој рече дека интеграцијата на северниот дел на Косово никогаш не била вистинска, дури и по повеќе од една деценија дијалог во Брисел, бидејќи се толерирани контрабандите, српските избори, српскиот динар, нелегалните српски регистарски таблички со ознаки на косовските градови, неплаќањето такси, локални и централни, неплаќањето на потрошената вода и струја.
Курти рече дека Владата на Косово е заинтересирана за разговори и соработка со српската заедница во Косово, со сите Срби кои треба да ги користат своите загарантирани места во Собранието и во Владата.
Тој истакна дека Србија преку криминални групи, користејќи го тој амбиент без целосно владеење на правото на северот на Косово, долго време ги држела и ги држи како заложници српските граѓани.
Курти рече дека дејствувањето на северот мора да биде внимателно и во согласност со чувствителноста на ситуацијата, поради што, како што истакна, Владата на Косово, во партнерство со пријателите, европските и американските партнери, толерирала повеќекратно одложување на примената на своите одлуки.
Косовскиот премиер го повика КФОР да гарантира слобода на движење, велејќи дека се чека КФОР да ги отстрани барикадите од патиштата на северот на Косово.
„Блокирањето на јавните патишта со тешки возила за да се спречи слободното движење од страна на криминалните групи кои целат кон нашите и полицајците на ЕУЛЕКС не само што е неприфатливо, туку не смее да се повтори во иднина. И чекаме, КФОР бара извесно време брзо да ја заврши оваа работа и чекаме, ако нашето очекување од КФОР е ублажување, нека се нарече тоа ублажување, но за општото добро верувам дека сепак го избираме најдобриот можен пат“, нагласи Курти.
Министерот за внатрешни работи на Косово Џелал Свечла на истата прес-конференција изјави дека патиштата на северот на Косово се блокирани на шест места, и дека Косовската полиција поради тоа привремено ги затворила за сообраќај граничните премини на северот, Јариње и Брњак.
Тој апелираше до организаторите да ги отстранат барикадите поставени на патиштата.
„Косовската полиција ги има потребните капацитети да дејствува во овој правец. Таа ги прави своите оперативни планови и во моментот кога ќе се процени дека е соодветно, доколку не се отстранат барикадите, ќе бидат преземени соодветни активности. Сето тоа се случува во координација со нашите партнери КФОР, ЕУЛЕКС и земјите од Квинтата, и верувам дека многу брзо ќе дојдеме до ситуација повеќе да нема барикади на овие два национални патишта“, нагласи Свечла.
Во исто време, Косовската полиција демантираше одредени српски медиуми дека специјалните единици на Косовската полиција на езерото Газивода привеле и малтретирале српски работник и дека одзеле објект на таа локација.
„Косовската полиција со своите единици е стационирана на магистралниот пат кој води кон Граничниот премин Брњак, не е стационирана во ниту еден конкретен објект и не малтретирала ниту едно лице или вработен, како што е објавено во медиумите, туку само легитимирала лице кое на таа локација снимало телефонски разговори, што по легитимирањето е продолжено без никакви проблеми“, наведуваат од полицијата.
Косовската полиција претходно соопшти дека синоќа од различни локации во три случаи било пукано врз полициски единици кои биле на службена должност во близина на браната на езерото Газивода.
На патиштата на северот на Косово локалното население, меѓу кое се видени и маскирани лица, вчера околу 16 часот поставило барикади, откако Косовската полиција претпладнето на Граничниот премин „Јариње“ го уапси Дејан Пантиќ, поранешен припадник на Косовската полиција, под основано сомнение за вмешаност во организирање напад врз канцеларија на Централната изборна комисија и напади врз службеници на ЦИК и Полицијата на Косово во вторникот во Северна Митровица и Зубин Поток.
