Косовската претседателка: „Русија го има вперено погледот кон Балканот“

АНТАЛИЈА, (АА) - Претседателката на Косово, Вјоса Османи, рече дека „Русија го вперила својот поглед кон Балканот“, јавува Анадолу.

Османи на панел-дискусија на Дипломатскиот форумот во Анталија изјави дека Косово се обидува да ги одржи мирот и стабилноста, заедно со засегнатите страни.

„Русија го има вперено погледот кон Балканот и сака да отвори нов фронт против Западот“, рече таа.

Истакнувајќи дека исходот од руско-украинската војна ќе биде пример за светот, таа рече дека Косово го поддржува „мирот што го сака Украина“ и светскиот поредок заснован на владеењето на правото.

Рускиот претседател Владимир Путин е загрижен само за себе во агресијата на Москва врз Украина, рече Османи.

„Сметам дека диктаторите не размислуваат за својот народ. (Поранешниот претседател на Југославија, Слободан) Милошевиќ исто така загуби стотици илјади свои војници, но тој се грижеше само за себе. Путин, исто така, се грижи само за себе, а не за своите стотици илјади војници“, рече таа.

Таа истакна дека дури и војна во далечна земја економски влијае на целиот свет, а како пример ја посочи руско-украинската војна.

Привлекувајќи внимание на важноста на Црноморската иницијатива за извоз на жито, Османи рече дека таа покажала дека дипломатијата може да се фокусира не само на безбедноста, туку и на економијата.

- Круцијалната улога на дипломатијата -

Истакнувајќи ја важноста на поддршката на пријателските земји во турбулентни времиња, претседателката Османи истакна дека Косово придава важност за воспоставување партнерства со земји и блокови како што се ЕУ, Туркије, САД и Бугарија.

Османи истакна дека Косово е многу млада земја. „Во дипломатијата, дури и малите придобивки се достигнувања и победи. Не можете да постигнете сè одеднаш. Искрено, понекогаш правиме многу мали чекори кон иднината“, рече таа.

Наведувајќи дека поддршката за земји кои минуваат низ тешки времиња не треба да биде еднократен настан, косовската претседателка истакна дека меѓународните сили треба да продолжат со поддршката и по прекинот на граѓанскиот конфликт во една земја.

„Навистина голема добивка за нас беше тоа што меѓународното јавно мислење и меѓународната заедница посебно дојдоа и застанаа покрај нас и потоа воспоставија мир“, рече таа, мислејќи на турбулентните времиња низ кои помина Косово за време на војната.

Објаснувајќи дека во војните и конфликтите страдаат невини луѓе, жени и деца, Османи истакна дека Обединетите нации не треба да остануваат бесчувствителни на тие прашања и дека нејзината земја е подготвена да ја даде потребната поддршка во такви моменти.