Косово: Четворицата потешко повредени во експлозија на плинска боца се префрлуваат на лекување во Турција

ПРИШТИНА

Четирите лица од Урошевац, Косово, кои беа сериозно повредени во експлозија на плинска боца, се префрлаат на лекување во Турција, јавува Агенција Анадолија (АА).

Ранетите, од аеродромот „Адем Јашари“ во Приштина, главниот град на Косово, со авион за итна помош на Министерството за здравство на Турција, се пренесуваат во Турција.

Министерот за здравство на Косово, Арменд Земај, кој внимателно го следи трансферот на пациентите, во изјавата за АА истакна дека се надева оти сериозно повредените лица по третманот во Турција здрави ќе се вратат во Косово.

„Им се заблагодарувам на турскиот народ и на Владата на Турција кои помагаат во најкраток рок и на најдобар начин да се излекуваат нашите граѓани“, нагласи министерот Земај.

Амбасадорот на Турција во Приштина, Чагри Сакар, истакна дека постои многу сеопфатен однос меѓу министерствата за здравство на Турција и Косово.

Посакувајќи повредените лица во експлозијата да оздрават, амбасадорот Сакар додаде: „Барањето за помош кое вчера стигна до нашата Амбасада, итно го пренесовме до нашите институции. Денеска сум многу среќен што четворицата пациенти ги испраќаме во Турција. И денес ја покажавме нашата солидарност со нашите пријатели од Косово.“

Повеќе од 40 лица беа повредени во експлозија на плинска боца во ресторан во Урошевац на 5 јануари.