Косово: Мисијата на ЕУЛЕКС ѝ донира на Украина 12 возила полни со хуманитарна помош

ПРИШТИНА (АА) - Мисија на Европската Унија за владеење на правото во Косово (EULEX) организираше церемонија на испраќање на „ЕУЛЕКС-овиот конвој во Украина“, со кој сака да му помогне на украинскиот народ кој е во војна, јавува Агенција Анадолија (АА).

Конвојот се состои од 12 возила на ЕУЛЕКС, што ќе бидат донирани на Советодавната мисија на Европската Унија (EUAM) во Украина.

Возилата се натоварени со прехранбени и непрехранбени артикли, вклучително облека, вреќи за спиење, средства за лична хигиена и медицински материјал, кои ќе бидат дистрибуирани на граѓаните на Украина, а кои ги собраа и ги купија вработените во ЕУЛЕКС.

Шефот на мисијата ЕУЛЕКС, Ларс Гунар Вигемарк, во таа прилика изјави дека се надева дека оваа помош ќе биде од корист на луѓето во Украина.

„Утринава се собравме да испратиме 10 возила на мисијата на ЕУЛЕКС во Украина, како и две дополнителни возила за затворениците. Овие 12 возила ќе бидат донирани на Државната гранична полиција на Украина. Овие донации ги овозможија нашите колеги во мисијата на Европската Унија во Украина, која е слична на мисијата на ЕУЛЕКС во Косово. Секое од овие 12 возила беше наполнето со хуманитарни залихи за Украина“, нагласи Вигемарк.

Исто така истакна дека вработените собрале пари за 23 семејства раселени во Украина и дека ова е само дел од поддршката кон браќата и сестрите во Украина.

Вигемарк потсети дека ЕУЛЕКС пред три месеци испрати донација со одреден број панцири и шлемови за колегите во Мисијата во Украина.

Вицепремиерката на Косово и министерка за надворешни работи и дијаспора, Доника Гервала, рече дека Косово од првиот ден на војната во Украина се позиционирало на страната на Украина и дека презело разни мерки против Русија.

„Сакаме секој граѓанин на Украина да знае дека луѓето во Косово многу добро разбираат низ што поминувате, бидејќи војната во Косово не се случи многу одамна и граѓаните тоа одлично го прифаќаат. Значи, ве молиме нашата солидарност да ја сметате како нешто сосема природно и нормално“, нагласи Гервала.

На церемонијата присуствуваше Иван Настенко, вишиот национален претставник на украинскиот контингент во рамките на КФОР, како и украински новинари кои бегајќи од војната во својата земја пронашле сместување во Косово.