ПОДГОРИЦА (АА) - Европската Унија (ЕУ) научи лекции од претходните проширувања и планира да воведе дополнителни заштитни мерки за да се осигури дека новите членки ги почитуваат правилата, изјави денес комесарката за проширување Марта Кос за време на посетата на Црна Гора, јавува Анадолу.

Кос на прес-конференцијата со премиерот Милојко Спајиќ во Подгорица изјави дека идните членки ќе бидат опфатени со таканареченото осигурување, кое има цел да спречи непочитување на европските стандарди по пристапувањето, но „ова не се однесува конкретно на Црна Гора“.

„Сакаме да бидеме сигурни дека може да реагираме во случај ако една од земјите членки не ги почитува правилата“, објасни Кос.

Таа истакна дека во моментов Црна Гора е најнапредна земја кандидат и дека постигнала значителен напредок во изминатата година, служејќи како пример за остатокот од регионот.

Според неа, клучни приоритети за натамошен напредок се забрзување на реформите, особено во областа на владеењето на правото и поголема поддршка за процесот на европска интеграција меѓу политичките партии, граѓанското општество и граѓаните.

Кос нагласи дека секоја земја кандидат мора да обезбеди независно судство и слободни медиуми, додавајќи дека Црна Гора би можела да стане прва земја што ќе се вклучи во ЕУ под нови, построги услови.

„Доколку ги исполните сите услови, ќе ги добиете сите права како земја членка“, рече таа.

Спајиќ рече дека фокусот на неговата Влада е на реформите во поглавјата 23 и 24, кои се однесуваат на судството и основните права, при што додаде дека очекува забрзано затворање на другите поглавја од преговорите.

Тој истакна дека досегашниот напредок е импресивен и дека Владата останува посветена на планираната динамика и покрај притисоците.

Говорејќи за неодамна донесените закони што предизвикаа политички тензии, Кос изјави дека одредени одредби, особено во врска со заштитата на податоците, сè уште не се целосно усогласени со правилата на ЕУ, но дека добила уверувања дека се работи на тоа.

Таа додаде дека во наредниот период Европската комисија внимателно ќе го следи спроведувањето на реформите.