Bedrudin Brljavac
11 Мај 2022•Ажурирај: 12 Мај 2022
САРАЕВО (АА) - Нашиот голем потенцијал во регионот во моментов се многу можности во областа на енергетиката, изјави поранешниот премиер на Северна Македонија, Зоран Заев, за време на 11. Сараево Бизнис-форум (СБФ), јавува Агенција Анадолија (АА).
„Нашиот регион има многу да понуди на Европската Унија и ЕУ е свесна за тоа. Прво, она што е нашиот потенцијал во моментов е голем потенцијал за енергија, што е една од најголемите причини за оваа економска криза што ја имаме сега. Имаме многу сонце, ветер и вода и можеме да привлечеме инвеститори за обновливи извори на енергија. Овде го имаме нашиот стратешки потенцијал, помеѓу влезот на најголемиот пазар, а тоа е ЕУ. Верувам дека ако регионот повеќе соработува и се подобрува меѓу себе, тоа ќе биде од уште поголемо стратешко значење за ЕУ“, рече Заев.
Тој потсети дека сите шест земји од регионот имаат потпишано договор за заеднички пазар, истакнувајќи дека сега треба да се работи на тоа.
„Затоа што политичките проблеми што ги имаат Србија и Косово се причина зошто тоа стои во место. Ако се обединиме, тогаш ќе бидеме повеќе почитувани и од Западна Европа и од Источна Европа. Затоа што сме поделени и сме мал пазар, а кога сме заедно, можеме да ги испорачаме нашите производи или сепак да привлечеме повеќе силни инвеститори. Западен Балкан има свој економски потенцијал. Знаете дека и јас го поддржувам Отворениот Балкан. Ова е нешто што сите можеме да го направиме сами без поддршка од ЕУ. ЕУ ни помага, и таа е тука, но ние самите можеме да направиме нешто. Верувам дека ќе има сѐ повеќе храбри одлуки за заеднички да дејствуваме кон остатокот од светот, што на крајот би го подобрило животниот стандард на нашите граѓани“, рече тој.
Порача дека политичките лидери мора да носат храбри одлуки бидејќи тие постојат за доброто на граѓаните.
„Босна и Херцеговина е мултиетничка земја како Северна Македонија. Направивме позитивни исчекори околу неа и денес е мирна, стабилна, а ние сме политички силни и финансиски ликвидни и одиме напред. Ние сме пријатели со сите наши соседи. Покажавме дека политичките лидери мора да донесат храбри одлуки затоа што постојат за своите граѓани и за нивните земји. За жал, тоа не го гледам во Босна и Херцеговина. Полесно им е да се караат или да прават блокади отколку да воспостават дијалог и да најдат решение. Политичарите мора да им служат на своите граѓани без оглед од која етничка заедница се тие. Верувам дека БиХ ќе има корист од искуството на другите земји затоа што сите сакаме БиХ да оди напред, брзо да добие кандидатски статус за ЕУ и еден ден да биде членка на ЕУ и НАТО и да биде една од силните земји на Западен Балкан“, рече Заев.
Во Сараево денеска започна 11. Сараево Бизнис-форум со повеќе од 1.000 учесници од 33 земји. По двогодишна пауза поради пандемијата на коронавирусот, оваа година Форумот ја продолжи традицијата на собирање на едни од најголемите деловни и политички лидери од регионот и светот.
Темата на овогодишниот форум е „Ниаршоринг – перспектива за регионот“, односно претставување на потенцијалот за прераспределба на производството на европските компании во Југоисточна Европа.
За време на дводневниот Сараево Бизнис-форум ќе бидат организирани пет панели, а на вториот ден од Форумот ќе се одржат Б2Б состаноци за да се вмрежат учесниците и да се развијат нови деловни можности.
Ќе бидат претставени околу 300 инвестициски проекти и бизнис-идеи, најмногу од Босна и Херцеговина, Хрватска, Србија, Северна Македонија, Црна Гора и Албанија.
Организатор на најголемата и најважна инвестициска конференција во регионот е „Босна банк интернешнл“ (BBI) д.д. Сараево под покровителство на Претседателството на БиХ и во соработка со стратешкиот партнер - Министерството за економија на кантонот Сараево, и акционерите на ББИ, „Банк - Исламска развојна банка“ (IsDB), „Дубаи исламска банка“ (DIB), „Абу Даби исламска банка“ (ADIB) и други партнери.
Глобален комуникациски партнер на 11. Сараево Бизнис-форум 2022 е Агенција Анадолија, а официјална авиопревозник на 11. Сараево Бизнис-форум е „Туркиш ерлајнс“.
