Zlatan Kapic
28 Август 2021•Ажурирај: 29 Август 2021
САРАЕВО (АА) - Претседателот на Република Турција, Реџеп Таип Ердоган, на денешната прес-конференција по состанокот со членовите на Претседателството на Босна и Херцеговина порача дека територијалната целосност, политичкото единство и суверенитетот на Босна и Херцеговина се клучот за мирот во регионот, јавува Агенција Анадолија (АА).
Ердоган денеска во Сараево се сретна со претседавачот и членовите на Претседателството на БиХ, Жељко Комшиќ, Шефик Џаферовиќ и Милорад Додик.
Потсетувајќи дека денешниот состанок со членовите на Претседателството на БиХ е трет годинава, Ердоган рече дека интензитетот на средбите е показател за важноста што се придава на односите со Босна и Херцеговина.
„Босна и Херцеговина има посебно место во срцата на нашиот народ. Пораките за солидарност од БиХ за време на поплавите и пожарите од кои бевме погодени изминатите недели се показатели за фактот дека љубовта на турскиот народ кон БиХ не е еднострана. Поради тоа, во свое име, и во име на турскиот народ му благодарам на претседавачот, членовите на Претседателството и на граѓаните на БиХ“, рече Ердоган.
Турскиот претседател нагласи дека на состанокот со членовите на Претседателството на БиХ договорено е интензивирање на соработката, во врска со идните можности, за чекорите на регионално, но и на глобално ниво.
Ердоган рече дека е договорено интензивирање на активностите поврзани со изградбата на автопатот Белград-Сараево, проектот на мирот, што ќе донесе развој за целиот регион и ќе ја зајакне поврзаноста.
„За време на посетата на членовите на Претседателството на БиХ на Анкара потпишан е ревидиран и надограден Договор за слободна трговија помеѓу Турција и БиХ, стапи на сила на 1 август 2021 година и ќе го подобри обемот на нашата трговска соработка. Турција сака унапредување на односите со БиХ во областа на туризмот, земјоделството и културата“, истакна Ердоган.
Како што рече, договорено е и интензивираање на чекорите со цел развој во секој поглед во корист на сите народи во регионот.
Ердоган ја повтори поддршката на Турција за патот на Босна и Херцеговина кон членство во Европската Унија и НАТО.
„Територијалната целосност, политичкото единство и суверенитетот на Босна и Херцеговина се клучот за мирот во регионот. Ќе продолжиме со заедничката работа со цел заштита на регионалната стабилност“, рече Ердоган.
Тој ја најави новата поддршка на турската Зират банка во однос на стопанскиот развој, но напомена дека во врска со големите инвеститори од Турција, потребно е да се надминат одредени бариери.
„Турција и БиХ имаат за цел да го зголемат обемот на трговска размена на една милијарда евра“, нагласи турскиот претседател.
Тој се осврна и на ситуацијата во Авганистан, велејќи дека според последните податоци бројот на загинати во нападите во Кабул достигна 170 лица.
„Тоа значи дека земјите во светот кои се сметаат за силни, кога ги напуштаат местата на кои се наоѓаат, мора да се однесуваат многу внимателно. Напуштањето на овие земји, препуштајќи ги на терористичките организации, носи тешки последици. На пример, ДЕАШ ја презеде одговорноста за нападите. Дали се борите против нив? Не. Турција пружи најголема борба против терористите на ДЕАШ. Што се однесува до талибанците, не е важно што говорат, туку што прават. Нивните постапки ќе ја обликуваат понатамошната ситуација. Турција од Авганистан ги извлече сите цивили, остана уште дел од техничките екипи. Ние ќе обезбедиме секаков вид помош за мирна иднина“, рече Ердоган.
