Bojan Bednar
25 Јуни 2022•Ажурирај: 26 Јуни 2022
БЕЛГРАД (АА) – Претседателот на Србија, Александар Вучиќ, рече дека гледа дека во Србија „постои голема хистерија против Европската Унија (ЕУ)“, и порача дека „парите што ги имаме ги имаме благодарение на огромниот број инвестиции кои во најголем дел ги донесовме од ЕУ и поддршката што ја имаме од ЕУ“, јавува Агенција Анадолија (АА).
Во обраќањето до нацијата, тој истакна дека „не му била лесна позицијата“ за време на самитот ЕУ-Западен Балкан, што се одржа во четвртокот во Брисел, бидејќи 16 претседатели на Влади и држави директно зборувале за неопходноста од усогласување на Србија со рестриктивните мерки против Руската Федерација.
Вучиќ нагласи дека Србија поради тоа не треба да оди „во другата крајност“ и да размислува како лесно може да најде замена за пазарите на другата страна, или да пронајде подобри партнери од оние во ЕУ, или Србија да помисли дека може да има некој друг политички пат.
„Ова го кажувам иако знам дека тоа во Србија речиси никој не сака да го слушне. Ова го говорам затоа што во политиката мора да постои рационален пристап, и мора барем понекогаш да постои глас на прагматичен пристап што води сметка за интересите на Србија и нејзините граѓани“, рече Вучиќ.
Тој наведе дека во Србија во странските компании директно работат 300.000 луѓе, а индиректно и половина милион, и нагласи дека барем две третини од тие компании се од ЕУ.
Вучиќ рече дека не може да го промени тоа што луѓето во Србија не разбираат колку е важна ЕУ, но дека и земјите од ЕУ не сакаат да слушнат колку ѝ е важно самата да донесе суд дали и кога да воведе или да не воведе санкции, и дека не сакаат да разберат колку се значајни за Србија „и Кинезите и Русите“.
Истакна дека Србија го продолжува својот европски пат и додаде дека работата на новата Влада ќе биде да направи уште многу во однос на владеењето на правото.
- „Ќе беше фер и другите да добиеја датум за почеток на преговорите“ -
Говорејќи за тоа што Украина и Молдавија на самитот во Брисел во четвртокот добија статус на кандидати за членство во ЕУ, а за Србија не беше отворен нов кластер во пристапните преговори, Вучиќ рече дека би било фер и другите да добиеја датум за почеток на преговорите.
Истакна дека Северна Македонија веќе 17 години има статус на кандидат, а Албанија осум години, но дека тие земји сè уште немаат добиено датум за започнување на преговорите.
„Да бидеме фер, ние сме далеку, далеку, напред во однос на нив, но наше е да покажеме солидарност и со братскиот македонски и со пријателскиот албански народ“, рече Вучиќ и додаде дека се надева дека Србија во декември може да отвори нов кластер.
Нагласи дека на самитот ЕУ-Западен Балкан за Србија било важно другите да ја слушнат и истакна дека тие други „бираа зборови и начин, и покажаа почит кон Србија“, за што се заблагодари, бидејќи „знам колкав е нивниот бес“ кон Србија.
„Мора да разберете, еден дел од ЕУ е во директна војна против Русија. Како очекувате позитивно да мисли за Србија некој што [на Украина] ѝ испраќа 12 големи хаубици, 30 тенкови и шест авиони, како мислите таа земја да се однесува кон Србија? Второ е тоа што тие не сакаат да ја слушнат нашата аргументација од 1999 година, што не сакаат да слушнат што зборуваме за територијалниот интегритет, затоа што тоа за нив е одамна завршена приказна“, рече Вучиќ.
- За изјавата на Курти -
Коментирајќи ја изјавата на косовскиот премиер Албин Курти дека не може да ја признае Србија додека таа не го признае Косово и дека затоа мисли дека е неопходно меѓусебно признавање, Вучиќ рече дека преговарачката рамка не може да се менува на сила.
„Ние имаме јасна преговарачка рамка која е преговарана, установена и воспоставена. Сега Курти посакува да ја смени преговарачката рамка и да го постави тоа како услов. Слушнете, тој ќе ја признава Србија. Да не е смешно, ќе беше тажно, вака човек мора барем да се насмее. Очајно ни е потребно неговото признавање“, рече Вучиќ.
