Во Скопје се одржа комеморација по повод 15 Јули

СКОПЈЕ (АА) - Во главниот град на Северна Македонија се одржа комеморативна церемонија по повод 15 Јули, Денот на демократијата и националното единство на Туркије, јавува Анадолу.

На свеченоста што се одржа во турската Амбасада во Скопје, во резиденцијата на Амбасадата присуствуваа вицепремиерот за политики и добро владеење на Северна Македонија, Арбен Фетаи, поранешниот претседател на Северна Македонија, Ѓорге Иванов, претседателот на Исламската верска заедница на Северна Македонија, Шаќир Фетаху, градоначалници, претставници на политички партии во земјава, претставници на турски институции и организации и многу гости.

Програмата започна со едноминутно молчење и интонирање на турската химна.

Во својот говор, амбасадорот Фатих Улусој потсети дека поминаа 8 години од обидот за државен удар на предавничката терористичка организација ФЕТО и дека членовите на ФЕТО кои се инфилтрираа во Турските вооружени сили имаа за цел да ги преземат државните институции.

Потсетувајќи дека како резултат на обидот за пуч загинаа 251 турски државјанин, а над 2.000 граѓани беа повредени, Улусој изјави дека обидот за пуч на 15 јули е запрен под водство на претседателот Реџеп Таип Ердоган, со одлучен став на силите за безбедност и турскиот народ.

Давајќи им информации на присутните за структурата на ФЕТО, Улусој истакна дека ја продолжуваат борбата за елиминација на структурите на ФЕТО во странство.

Амбасадорот Улусој истакна дека продолжуваат напорите за затворање на образовните институции поврзани со ФЕТО во странство и нивно префрлување на турската Фондација Маариф, додавајќи дека активностите на училиштата на ФЕТО во многу пријателски и братски земји биле запрени и преземени од турската Фондација Маариф.

Тој посочи дека Северна Македонија е меѓу земјите каде што функционира Фондацијата Маариф, и додаде: „Од друга страна, со тага гледаме дека ФЕТО сè уште го продолжува своето присуство во Северна Македонија. Под маската на образовна институција, три училишта поврзани со ФЕТО, во Скопје, Тетово и Струга, продолжуваат да функционираат и денес, користејќи го името на Јахја Кемал, еден од значајните поети на турската литература. Ние им го објаснуваме вистинското лице на ФЕТО на нашите соговорници во Северна Македонија со конкретни примери. Се надеваме дека во претстојниот период ќе ја зголемиме нашата соработка во борбата против оваа предавничка терористичка организација“.

Наведувајќи дека Туркије ќе ја продолжи својата решителна борба против сите терористички организации, вклучително и ФЕТО, дома и во странство, Улусој рече: „Очекуваме сите земји да дејствуваат во духот на соработката и солидарноста во борбата против тероризмот. Турците во странство имаат голема одговорност да се подигне свеста за вистинското лице на терористичката организација ФЕТО. Прикажете ја оваа терористичка организација во секој дел од Северна Македонија. Информирајте ги сите наши пријатели за нивните предавнички амбиции“.

Амбасадорот Улусој во својот говор говореше и за шумските пожари што се случуваат во летните месеци во Северна Македонија, при што истакна: „Вчера попладне презедовме брзи активности, во рамките на барањето што го добивме од Владата на Северна Македонија, а од утрово слетаа во Скопје два противпожарни авиона и еден противпожарен хеликоптер од нашата земја. Ние и Северна Македонија сме секогаш пријатели и браќа, и во добри и во лоши времиња“.

Во рамките на комеморативната церемонија по повод 15 Јули се извршија молитви и се прочитаа делови од Куранот.

- Комеморативна програма одржа и Турското консултантство за верски служби -

Од друга страна, пред пладневната молитва во Мурат-пашината џамија во Старата скопска чаршија беше организирана комеморативна програма за шехидите од 15 јули во организација на Консултантството за верски служби при Турската амбасада во Северна Македонија.

На програмата, покрај амбасадорот Улусој, присуствуваа и турските пратеници Салих Мурат и Бејџан Иљас, претставници на турските институции и организации во земјата, како и бројни верници.

Во рамки на програмата се изведуваа илахии на турски и албански јазик и се рецитираа молитви.