Agim Sulaj
17 Февруари 2026•Ажурирај: 17 Февруари 2026
ПРИШТИНА (АА) - Во чест на 17 февруари, Ден на независноста на Косово, во главниот град на Косово, Приштина, се одржа дефиле на припадниците на Косовските безбедносни сили (КБС) и Полицијата на Косово, јавува Анадолу.
Дефилето на улицата „Луан Харадинај“ во главниот град се одржа во присуство на државниот врв, институционални претставници, семејствата на паднатите борци и стотици граѓани.
Пешадиските единици на КБС продефилираа пред присутните, построени според репрезентативни формации, демонстрирајќи дисциплина и професионализам.
По нив продефилираа специјализираните единици на Полицијата на Косово, вклучително и Специјалната единица за интервенција, Единицата за брз одговор и други оперативни структури, опремени со современо оружје и средства.
Во рамките на церемонијата беше презентиран и дел од воените возила со кои е опремена Војската на Косово. Дефилето беше проследено со аплауз од граѓаните, кои излегоа покрај улицата за одблизу да ја следат традиционалната церемонија.
- Претседателот на Албанија, Бајрам Бегај, ја изрази поддршката на Албанија за Косово -
Претходно, Собранието на Косово одржа свечена седница, на која присуствуваа челниците на институциите, дипломати и различни гости.
Претседателката Вјоса Османи изјави дека пред 18 години Косово беше прогласено за слободна, независна и суверена држава, ставајќи крај на долг и болен пат, но отворајќи ново поглавје во националната историја.
Во пресрет на масовен протест за барање правда, а не политика од Специјалниот суд во Хаг, претседателката Османи рече дека „секој обид да се извалка тоа е неправеден, историски неточен и неприфатлив. Лидерите на Ослободителната војска на Косово (ОВК) што денес се наоѓаат во Хаг заедно со илјадници борци и со нашиот народ се кренаа за слобода и достоинство“.
Претседателот на Албанија, Бајрам Бегај, ја изрази поддршката на државата Албанија за Косово, како и за поранешните лидери на ОВК кои се судат во Хаг. Тој во своето обраќање на свечената седница рече дека „Република Албанија е со ОВК, со командантите и војниците на ОВК, со граѓаните на Косово, со нивните болки“.
Премиерот Албин Курти изјави дека Република Косово нема да попушти кога станува збор за државниот суверенитет, територијалниот интегритет и народната демократија.
Во врска со судењето на поранешните лидери на ОВК, на оваа седница зборуваше и премиерот Курти, кој рече дека обвиненијата на Обвинителството во Хаг не стојат.
„Загрижени сме што лидерите на ОВК и на Република Косово се обвинети неправедно затоа што се осмелија да земат оружје за слобода против едновековното угнетување и еден геноциден режим“, изјави Курти.
- Ја потврдуваме нашата посветеност за унапредување на добрососедските односи -
Активностите за одбележување на годишнината од независноста продолжија со оддавање почит пред спомениците на паднатите борци, како и со други институционални и културни активности во главниот град и во другите градови на земјата.
Од друга страна, Министерството за надворешни работи и надворешна трговија на Северна Македонија објави честитка по повод независноста на Косово.
„Ја потврдуваме нашата посветеност за унапредување на добрососедските односи, регионалната соработка и заедничката европска иднина изградена врз мир, стабилност и просперитет“, се наведува во пораката.
