ИСТАНБУЛ (АА) - Бројот на приведени лица за време на националниот штрајк и протести низ Франција се зголеми на речиси 100 за само пет часа, според телевизиската мрежа БФМ ТВ, пренесува Анадолу.

Досега се приведени 99 лица, од кои 15 во регионот на Париз, што е скок од 30 приведувања во раните утрински часови на протестите предводени од синдикатите.

Две лица, еден новинар и еден полицаец, се повредени во судирите меѓу демонстрантите и полицијата во Лион.

Околу 50 демонстранти накратко влегоа во комплексот на Министерството за економија и заминаа неколку минути подоцна.

Вклучувајќи се во маршот во Париз, генералната секретарка на синдикатот ЦГТ, Софи Бине, рече дека мобилизацијата е „веќе успешна“, наведувајќи учество од над 400.000 луѓе.

Утрово 23 училишта беа целосно блокирани, во 52 имаше делумни блокади, а околу 17% од наставниците штрајкуваат, според Министерството за образование.

Властите, исто така, објавија дека напладне во Марсеј имало 13.000 демонстранти и 20.000 во Лион.

Министерот за внатрешни работи во заминување, Бруно Ретајо, информираше дека имало обиди за блокади низ Париз, како и обид за саботажа на водоводната мрежа во Мартиник.

Протестни собири се одржуваат и во Вар, Каен, Финестер и Тулон.

Штрајкови беа организирани и во училиштата – средното училиште во Париз беше блокирано од учениците, а околу 33% од наставниците во основните училишта се вклучија во протестите.

Мобилизацијата, организирана од најголемите француски синдикати, е одговор на контроверзните буџетски предлози што ги претстави поранешниот премиер Франсоа Бајру.

Претходно Ретајо изјави дека очекува „многу, многу силна“ мобилизација во повеќе сектори – јавни услуги, образование, транспорт, земјоделство, индустрија и култура.

Министерството за внатрешни работи најави распоредување на повеќе од 80.000 полицајци и жандарми низ земјата, како и употреба на оклопни возила, дронови и водени топови.

Во потег што не е виден од протестите на „Жолтите елеци“, 24 оклопни возила „Кентаур“ ќе бидат распоредени низ цела Франција, заедно со десетина водени топови.

Планирани се околу 40 синдикални маршеви низ Франција, а првичните процени покажуваат дека ќе учествуваат до 800.000 демонстранти.

Акцијата на 18 септември следува по мобилизацијата „Блокирај сè“ од минатата недела, на која учествуваа речиси 197.000 луѓе на национално ниво.

- Контроверзниот национален буџет -

Франција се соочува со зголемени политички тензии откако на 8 септември на Бајру не му беше изгласана доверба во Националното собрание.

Тој во јули го претстави буџетскиот план за 2026 година, со цел да заштедат речиси 44 милијарди евра за намалување на јавниот долг, кој достигна 113 % од БДП на земјата.

Францускиот претседател Емануел Макрон го назначи министерот за вооружени сили Себастијен Лекорни за нов премиер, задолжувајќи го да започне консултации со политичките партии пред формирањето на новата влада.

Франција има еден од најголемите буџетски дефицити во ЕУ – 5,8% од БДП.

Минатогодишниот неуспех да се постигне договор за буџетот за 2025 година доведе до пад на Владата на Мишел Барние во декември откако левичарските и крајно десничарските партии се обединија зад предлогот за недоверба.