АНКАРА (АА) - Преносот во живо на францускиот јавен радиотелевизиски дифузер „Франс Инфо“ беше прекинат поради закана од бомба, известува Анадолу.

Вчера се слушна аларм за време на преносот во живо од студиото на „Франс Инфо“ во Париз.

Додека водителот Жан-Кристоф Галеаци во студиото во програма во живо дискутирал со новинарите за украинската политика, се вклучил аларм. Галеаци рекол дека мораат да го прекинат преносот поради закана од бомба.

Преносот во живо бил прекинат по најавата на водителот.

Во писмено соопштение, „Франс Инфо“ наведе дека откако владините агенции го известиле каналот за закана од бомба, студиото во Париз било евакуирано од безбедносни причини, а полицијата започнала истрага.

Вработените се вратиле во зградата во рок од приближно два часа по завршувањето на истрагата.

Пред две недели и францускиот канал BFM TV доби закана за поставена бомба.