Полскиот министер за надворешни работи Радослав Сикорски изјави дека Русија е малку веројатно да ризикува воен конфликт со НАТО, оценувајќи дека Москва значително ги исцрпела своите воени капацитети во тековната војна во Украина, јавува Анадолу.

Во интервју за чешкиот неделен весник „Респект“, пренесено од „ТВП Ворлд“, Сикорски изјави дека Русија претрпела до еден милион жртви во Украина, што, според него, ја оставило руската Армија ослабена и неспособна да влезе во нови конфликти.

Тој додаде дека на Москва ќе ѝ бидат потребни неколку години за повторно да ја изгради својата војска, што, како што рече, им дава време на европските држави да ги зајакнат своите одбранбени капацитети. Сепак, предупреди дека рускиот претседател Владимир Путин сè уште би можел да направи „кардинална грешка“.

Тој нагласи дека европските трошоци за одбрана се удвоиле за време на мандатот на Трамп и оцени дека САД „нема да ја напуштат“ Европа, и покрај пренасочувањето на ресурси кон други глобални приоритети.

„Европа ќе мора да преземе поголем дел од одговорноста за сопствената безбедност“, рече Сикорски.

Тој ги отфрли шпекулациите дека американската стратегија охрабрува одредени земји, меѓу кои и Полска, да ја напуштат ЕУ, оценувајќи дека евентуален полски излез од Унијата би бил „катастрофален“. Сикорски повтори дека целта на Варшава е да остане и „сигурен сојузник на Вашингтон“ и „влијателна членка на ЕУ“.

Воедно, тој ја доведе во прашање логиката на лидерите како унгарскиот премиер Виктор Орбан и словачкиот премиер Роберт Фицо, кои тврдат дека се потпираат на евтина руска енергија.

Според Сикорски, двете земји би можеле да ги задоволат своите енергетски потреби од јужна Европа по слични цени во рамки на долгорочни договори.