БЕРЛИН (АА) - Речиси две третини од Германците ја поддржуваат одлуката на канцеларот Фридрих Мерц за делумно замрзнување на извозот на оружје за Израел, покажа анкетата на „YouGov“ објавена денес, јавува Анадолу.

Според анкетата, околу 65 % од Германците го поддржуваат потегот, 19 % од гласачите со право на глас сметаат дека е погрешен, додека 16 % немаат одредено мислење.

На 8 август, повикувајќи се на одлуката на Израел за целосна окупација на градот Газа, Мерц објави дека засега нема да биде одобрен извоз на воена опрема што може да се користи во војната во Газа.

По критиките од неговата Христијанско-демократска унија (CDU) и нејзината сестринска партија, Христијанско-социјалната унија (CSU), Мерц нагласи дека Германија ќе продолжи да му помага на Израел да се брани, но дека не може да снабдува оружје во конфликт што може да однесе стотици илјади цивилни жртви.

Според анкетата, одлуката на Мерц добила натпросечно одобрување кај оние кои гласале за опозициските, партијата на Зелените и Левичарската партија, како и за ковладејачката Социјалдемократска партија (SPD) или CDU/CSU на изборите во февруари. Делумното запирање на испораката не беше толку добро прифатено од гласачите на крајно десничарската АфД.

Германија долго време е цврст поддржувач на Израел, при што политичките лидери како причина често ја наведуваат историската одговорност на земјата кон Израел што произлегува од нејзиното нацистичко минато и холокаустот на Евреите за време на Втората светска војна.

Со месеци, Мерц ги отфрлаше повиците од опозициските пратеници да го запре извозот на оружје за Израел и ги отфрлаше повиците од членките на ЕУ да го суспендира трговскиот договор со Тел Авив, дури и кога воената кампања и блокадата на Израел во Газа резултираа со над 62.000 жртви, меѓу кои речиси половина се жени и деца.

Официјалните бројки покажуваат дека Германија одобрила извоз на оружје за Израел во вредност од речиси половина милијарда евра откако ескалираше конфликтот во Газа пред две години. Како одговор на истрагата, германското Министерство за економија потврди дека помеѓу 7 октомври 2023 година и 13 мај 2025 година, одобриле испорака на оружје и воена опрема за Израел во вредност од 485 милиони евра.