ھەولێر.. بەھۆی بارانبارینەوە چەند ئۆتۆمبێلێک ژێر ئاوکەوتن

ھەولێر- AA

بەھۆی ئەو شەپۆلە بارانبارینەی چەند رۆژێکە ھەرێمی کوردستانی گرتووەتەوە، بووەتە ھۆی کۆبوونەوەی ئاو لە ھەندێک شوێن و ئاستەنگی بۆ ھاتوچۆش دروست بووە.

لە گەڕەکی سەیداوەی شاری ھەولێر، چەند ئۆتۆمبێلێک لای پردی سەیداوە ژێر ئاو کەوتن و تیمەکانی بەرگری شارستانی خەریکی دەرھێنانی ئۆتۆمبێلەکانن.

بەھۆی ئەوەی گەڕەکی سەیداوە نزیکە لە بازاڕی شێخەڵڵا و بازاڕی سەیداوە، بۆیەش ئۆتۆمبێلەکان کاتێک ژێر ئاو کەتوون کە شوفێری تیادا نەبووە و خاوەنەکانییان بەھۆکارێک ئۆتۆمبێلەکانییان ڕاگرتووە چوونەتە بازاڕ.

لەم کاتەشدا شەپۆلێکی بەھێزی بارانبارین لەشاری ھەولێر ھەبووە و بووەتە ھۆی کۆبوونەوەی ئاو لە ھەندێک شوێن، یەکێک لەو شوێنانەش ژێر پردی سەیداوە بووە.

ژێر پردی سەیداوە شوێنکی داخراوە و شوێنی دەرچوونی ئاو و ئاوەڕۆی نییە و ساڵانە لەگەڵ دەستپێکی وەرزی بارانبارین، ھۆشداری دەدرێت کە شوفێران ئۆتۆمبێل لەم شوێنە ڕانەگرن.

دوێنی کەشناسی ھەرێمی کوردستان، ھۆشداری دابوو کە شەپۆلێکی بارانبارین ناوچەکە دەگرێتەوە و داوا لە ھاووڵاتییان کرابوو بەھۆکارێکی پێویست نەبێت، لەماڵەکانییان بمێننەوە.