لە ھەورامان بە بەشداری زیاتر لە ٢٧٠ دەفژەن فێستیڤاڵی جەژنی گەورە بەرێوەچوو

سلێمانی - AA

بەبەشداریی زیاتر لە ٢٧٠ دەفژەن، دووەمین فێستیڤاڵی جەژنی گەورە لە میراتی جیهانیی هەورامان لە شارۆچکەی باینگان سەربە قەزای پاوە باکووری پارێزگای کرماشان رۆژئاوای ئێران، بەڕێوەچوو.

❮❯

لە ھەورامان بە بەشداری زیاتر لە ٢٧٠ دەفژەن فێستیڤاڵی جەژنی گەورە بەرێوەچوو

سەرەتای فێستیڤاڵەکە کە ژمارەیەک بڕگەی لەخۆگرتبوو، لە دوای خوێندنەوەی چەند ئایەتێک لە قورئانی پێرۆز، ژمارەیەک گوتار و پارچە شیعر و پەخشان پێشکەش کرا.

هەر لە میانی فێستیڤاڵەکەدا بازاڕی کاڵا خۆماڵییەکان کرایەوە کە تیایدا جلوبەرگی کوردی و خۆراکە خۆماڵییەکان نمایش کران.

گۆرانی و سیاچەمانە و لاواندنەوە بەشێک بوون لە چالاکییەکانی فێستیڤاڵە.

زیاتر لە ٢٧٠ دەفژەن کە زۆربەیان دانیشتووی شارۆچکەی باینگان بوون، لەسەر پاساری خانووە فۆلکلۆرییەکان لەگەڵ گوتنی سرووتی ئایینی دەفژەنیان دەکرد کە ژن و پیاو کوڕ و کچ و بەشێکیشیان منداڵ بوون و لە زۆرێک لە شارەکانی ئێرانەوە بەشداریی فێستیڤاڵەکە بوون.

هاوکات ژمارەیەکی زۆری گەشتیار لە سەرتاسەری ئێرانەوە بۆ بینینی چالاکییەکانی فێستیڤاڵەکە هاتبوونە شارۆچکەکە و منداڵان بەڕیز وەساتابوون و بە زمانی فارسی و هەردوو شێوەزاری سۆرانی و هەرامی بە خێرهاتنی میوانەکانیان دەکرد.

سەرپەرشتیارانی فێستیڤاڵەکە و لایەنە پەیوەندارەکان ئامادەکاریی پێویستیان لە رووی ئەمنیی، تەندروستیی وهاتوچۆی ئۆتۆمبێلەوە گرتبووەبەر.

باینگان شارۆچکەیەکی شاخاوی سەربە قەزای پاوە سەربە پارێزگای کرماشانە کە بەدووی ١٢٠ کیلۆمەتر دەکەوێتە باکووری رۆژئاوای شاری کرماشان.