لە رۆژی جیهانی ئاشتی دا ماراسۆن بەڕێوەچوو

ھەولێر

لە شاری ھەولێر زیاتر لە ھەزار کەس لە لە پێناو ئاشتی دا ماراسۆنیان بەڕێوە برد.

ماراسۆنەکە لە شوێنی راکردنی پارکی سامی عەبدولرەحمان بەڕیوە چوو و ١٥ کەسی یەکەم لەو ماراسۆنەدا رێزیان لێ گیرا.

جێگری رێکخەری گشتی ماراسۆنی نێودەوڵەتی ھەولێر ئەحمەد جەمیل بۆ ئاژانسی ئانادۆڵو گوتی: "ئەمڕۆ رۆژی جیھانی ئاشتییە و ئێمەش ئەو ماراسۆنەمان رێکخستووە بۆ ئەوەی پەیامێکی ئاشتی بە جیھان بگەیەنین و ھەروەھا خۆئامادە کردنێک بێت بۆ ماراسۆنی نێودەوڵەتی".

ئەو چالاکییە لە لایەن ئەنجوومەنی رێکخراوە ناحکوومییەکانی کوردستان و بە ھاوکاریی لێژنەی باڵای ماراسۆنی نێودەوڵەتی ھەولێر و رێکخراوی یارییەکانی ئاشتی جیھانی و کۆمەڵەی دۆستایەتی کوردستان و ژاپۆن و دەزگای روانگە ئەنجام درا.

بەرپرسی راگەیاندنی دەزگای خێرخوازی روانگە زیرەک ژێدار لەبارەی ماراسۆنی ئاشتی گوتی: "ئێمە بەشێک بووین لە رێکخستنی ئەو ماراسۆنە ئەمەش بۆ ئەوە بووە کە تەنیا بە ھەموو جیھان بڵێین کە ئەوە لە پێناو ئاشتیدایە و پشتگیری لە ئاشتی جیھانی دەکەین و ئەو ھەزار کەسە ھەموویان لە پێناو یەک پەیام ھاتوونەتە ئێرە و و ئەوان تەنیا ئاشتی کوردستان نە بەڵکو ئاشتی جیھانیان دەوێ".