دەریاچەی بەفراوەکانی دێرسم دیمەنێکی دڵڕفێنیان هەیە

دێرسم - AA

دەریاچەی بەفراوەکانی دۆڵی مەرجان لە شارۆچکەی ئۆڤاجک سەربە پارێزگای دێرسم کە بەهۆی توانەوەی بەشێکی بەفری چیاکانەوە دروستبوون، دیمەنێکی دڵڕفێنیان هەیە و بوونەتە جێگای سەرنجی گەشتیاران.

شارۆچکەی ئۆڤاجک کە هەزار و ٥٠٠ مەتر لە ئاستی رووی دەریا بەرزە و لەنێوان چیاکانی مونزوور و مەرجان هەڵکەوتووە، خاوەنی دیمەنێکی سروشتی سەرنجڕاکێش و میراتێکی کولتووری دەوڵەمەندە، ئەمەش وای کردووە لە هەموو وەرزەکانی ساڵدا گەشتیاران رووی تێبکەن.

لەئێستاشدا بەهۆی توانەوەی بەفری چیاکانەوە لەناو دۆڵی مەرجان چەند دەریاچەیەکی بەفراو دروستبوون کە بەلای گەشتیارانەوە جوانترین و سەرنجڕاکێشترین دیمەنی ناوچەکەیان هەیە و رۆژانە خەڵکی لەڕێی گرووپە گەشتیارییەکانەوە یاخود بە ئۆتۆمبێلی خۆیان بۆ گەشت و سەیران دێنە ئۆڤاجک و دۆڵی مەرجان.