مەشق و راھێنان بۆ پاڵەوانێتی پاسکیلسواری عێراق

سلێمانی ـ AA

لاڤان ئەحمەد محەمەد تەمەن ٢٣ ساڵان یاریزانی ھەڵبژاردەی پاسیکلسواری عێراقە، ئەو لە ساڵی ٢٠١٢ لە سلێمانی و لە یانەی وەرزشی نەورۆز دەستی بە راھێنان و وەرزشی پاسکیلسواری کردووە و دوای ساڵێک بۆ ھەڵبژاردەی عێراق ھەڵبژێردراوە.

لاڤان دەڵێت لە منداڵییەوە پاسکیلی ھەبووە و خولیای پاسکیل لێخوڕینی ھەبووە، دواتر زیاتر برەوی بەو خولیایەی داوە تا گەیشتووەتە ئاستی ھەڵبژاردەی عێراق و بەشداری پاڵەوانێتییە نێودەوڵەتییەکانی کردووە.

ئەو لە بارەی ئەو خولانەی تائێستا بەشداری کردووە بۆ ئاژانسی ئانادۆڵو گوتی: "پێشتر بەشداری چەندین پاڵەوانێتیم لە وڵاتانی عەرەبی و ئاسیا و ئەفریقا کردووە، پێش دوو ھەفتەش بەشداری پاڵەوانێتییەکی ئەورووپیمان کرد کە زۆربەی وڵاتانی ئەورووپی بە ٧٠٠ یاریزان بەشدار بوون و لە ئەنجامدا پلەیەکی باشمان بەدەستھێنا".

لە ئێستادا لاڤان و ھاوڕێکانی رۆژانە لە شاری سلێمانی سەرقاڵی مەشق و راھێنانن بۆ بەشداریکردن لە پاڵەوانێتییەکی عێراقدا.

ئەو لەو بارەیەوە گوتی: "لە ئێستاشدا سەرقاڵی مەشق و راھێنانین بۆ بەشداریکردن لە قۆناغی سێی پاڵەوانێتی ھەڵبژاردەی عێراق کە بڕیارە لە دیوانییە بەڕێوە بچێت لە رۆژی 7ی ئەم مانگەدا بۆ ھەڵبژاردنی یاریزانانی ھەڵبژاردەی عێراق".

لاڤان نیگەرانە لەوەی لە ھەرێمی کوردستان گرنگی بە یاری پاسکیلسواری نادرێت و ماوەی چەند ساڵیشە ھیچ پێشبڕکێ و پاڵەوانێتییەک بۆ پاسکیلسواری ئەنجام نەدراوە، باس لەوەش دەکات تەنھا یانەی نەورۆز ماوە کە لەو بوارەدا کار دەکات، بەڵام ئەویش بەھۆی کێشەی داراییەوە کێشە و گرفتی زۆریان ھەیە و بەرەو نەمان ھەنگاو دەنێت.