ھەولێر.. زیاتر لە ٢٠ رێستورانت و کافتریا سزادران

هەولێر - AA

بەھۆی پابەند نەبوون بە رێنماییە تەندروستییەکان و بڕیارەکانی پارێزگای ھەولێر سەبارەت بە خۆپارێزی لە ڤایرۆسی کۆرۆنا، زیاتر لە ٢٠ رێستورانت و کافتریا سزادران.

راگەیاندنی پارێزگای هەولێر بڵاویکردووەتەوە کە دوای بەدواداچوون و چاودێریکردنی رێستورانت و کافتریاکانی سەنتەری شاری ھەولێر لە جێبەجێکردنی بڕیارەکانی پارێزگای ھەولێر و رێنماییە تەندروستییەکان، پۆلیسی شارەوانی سەر بە قایمقامیەتی ناوەند و لێژنەی دەستەی گەشتوگوزار ھەڵسان بە پشکنینی ێستورانت و کافتریاکانی سەنتەری شاری ھەولێر.

لە راگەیاندراوەکەدا ئەوەشخراوەتەڕوو کە لە ئەنجامی پشکنینەکاندا ٢٨ رێستورانت و کافتریا بەھۆی سەرپێچی و پابەند نەبوون بە رێنماییە تەندروستییەکان و بڕیارەکانی پارێزگای ھەولێر، سزایی دارایی (غرامە) کران، دوای داخستنی شوێنەکانیش بەڵێنامە لە خاوەنەکانیان وەرگیرا بۆ دووبارەنەکردنەوەی سەرپێچییەکان.