پیشانگه‌ی زانكۆكانی توركیا له‌هه‌ولێر كرایه‌وه‌

هه‌ولێر-AA

پیشانگه‌ی زانكۆكانی توركیا له‌هه‌ولێر دوو رۆژ ده‌خایه‌نێت و ئه‌مڕۆ یه‌كه‌م رۆژی پیشانگه‌كه‌ بوو، چاوه‌ڕوان ده‌كرێت ژماره‌یه‌كی زۆر فێرخواز سه‌ردانی بكه‌ن.

ئه‌مڕۆ شه‌ممه‌ پیشانگه‌ی په‌روه‌رده‌یی زانكۆكانی توركیا له‌ هۆڵی هۆتێل دیدمان له‌ شاری هه‌ولێر كرایه‌وه‌ كه‌ تێیدا 28 زانكۆی توركیا هاتوونه‌ته‌ هه‌رێم بۆ ئه‌وه‌ی ئۆفه‌ر و زانیارییه‌كانی خوێندن له‌و وڵاته‌ بۆ فێرخوازانی هه‌رێمی كوردستان و عێراق به‌گشتی بخه‌نه‌ به‌رده‌ست.

پیشانگه‌كه‌ كه‌ ئه‌مڕۆ و به‌یانی یه‌كشه‌ممه‌ش به‌رده‌وامیی ده‌بێت له‌ كردنه‌وه‌كه‌یدا كونسوڵی گشتی توركیا له‌هه‌رێمی كوردستان هاكان كاراچای و ژماره‌یه‌ك له‌ به‌رپرسانی وه‌قفی مه‌عاریفی توركی و به‌رپرسانی وه‌زاره‌تی خوێندنی باڵا و په‌روه‌رده‌ی هه‌رێم و په‌رله‌مانتار و چه‌ندین خوێندكاریش بۆ وه‌رگرتنی زانیاریی له‌وێ ئاماده‌بووبوون.

به‌رپرسی وه‌قفی مه‌عاریفی توركی له‌ عێراق محه‌مه‌د ئه‌مین شیمشه‌ك له‌لێدوانێكدا بۆ ئاژانسی ئانادۆڵو رایگه‌یاند "وه‌كو وه‌قفی مه‌عاریفی توركیا بۆ یه‌كه‌مجاره‌ له‌هه‌ولێر هه‌ڵده‌ستین به‌كردنه‌وه‌ی پیشانگه‌ی خوێندن، بۆ ئه‌نجامدانی چالاكیی په‌روه‌رده‌یی داواكارییه‌كی زۆر هه‌یه‌ به‌و هۆیه‌وه‌ ویستمان ئه‌و قوتابییانه‌ی ده‌یانه‌وێت له‌ توركیا بخوێندن و درێژه‌ به‌خوێندنی زانكۆیی بده‌ن له‌گه‌ڵ زانكۆكاكانی توركیا به‌یه‌كترییان ئاشنا بكه‌ین".

هه‌روه‌ها گوتیشی "28 زانكۆی توركیا به‌شدارن له‌م پیشانگه‌یه‌دا، پیشانگه‌كه‌ خواستێكی زۆری له‌سه‌ره‌ و قوتابیان لێره‌ ده‌یانه‌وێت له‌توركیا درێژه‌ به‌خوێندن بده‌ن كه‌ ئێمه‌ لێره‌ ئاسانكارییان بۆ ده‌كه‌ین".

كۆنسوڵی گشتی توركیا له‌هه‌رێمی كوردستان هاكان كاراچای له‌ وتارێكدا له‌به‌رده‌م ئاماده‌بووانی رێوڕه‌سمی كردنه‌وه‌ی پیشانگه‌كه‌ گوتی" توركیا له‌ بواری خوێندندا بووه‌ته‌ یه‌كێك له‌ ناوه‌نده‌ گرنگه‌كان له‌سه‌ر ئاستی ناوچه‌كه‌ و جیهان، له‌ ئێستادا له‌ 205 زانكۆی توركیادا 7 ملیۆن و 616 هه‌زار قوتابی درێژه‌ به‌خوێندنی زانكۆیی ده‌ده‌ن، هه‌موو ساڵێك بۆ بونیادنانی ژێرخانی زانكۆكان زیاتر ده‌بێت و له‌هه‌مان كاتدا خواستی هاوڵاتییانی توركیا و ده‌ره‌وه‌ی توركیاش زیاتر ده‌بێت".

كاراچای له‌درێژه‌ی قسه‌كانیدا گوتی "تاوه‌كو ساڵی پار ژماره‌ی ئه‌و قوتابییانه‌ی له‌ توركیا ده‌یانخوێند زیاتر له‌ 125 هه‌زار قوتابی بوون، له‌ ئامانجه‌كانی ساڵی 2023 كار ده‌كه‌ین بۆ به‌رزكردنه‌وه‌ی ئه‌و ژماره‌یه‌ بۆ 250 هه‌زار قوتابی، واته‌ دوو هێنده‌".

هه‌روه‌ها ئه‌وه‌شی گوت ئه‌و فێرخوازانه‌ی له‌عێراق ده‌یانه‌وێت بۆ خوێندن بچنه‌ توركیا ئاسانكاریی پێدانی ڤیزایان بۆ ده‌كرێت.

چه‌ندین فێرخواز له‌نێو پیشانگه‌كه‌دا هه‌بوون كه‌ ده‌یانویست بۆ پرسیار كردن له‌سه‌ر زانكۆكانی توركیا زانیاریی وه‌ربگرن بۆ ئه‌وه‌ی درێژه‌ به‌خوێندن بده‌ن، هه‌ربۆیه‌ش نوێنه‌رانی ئه‌و زانكۆیانه‌ی توركیا زانیاریی ته‌واویان به‌ فێرخوازان ده‌دا.