پارێزگاری دیالە: "زیاتر لە ھەزار چەکداری داعش لە میحوەری سێ پارێزگا بوونیان ھەیە"

ھەولێر ــ AA

پارێزگاری دیالە، موسەننا تەمیمی رایگەیاند کە زیاتر لە ھەزار چەکداری داعش لە میحوەری کەرکووک، دیالە و سەڵاحەددین بوونیان ھەیە.

موسەننا تەمیمی لە لێدوانێکی رۆژنامەوانییدا ئاماژەی بەوەداوە کە ژمارەیەک خێزانی نیشتەجێی گوندەکانی دەورووبەری قەزای میقدادییە (شارەبان) دوای پەلامارەکەی تیرۆریستانی داعش بۆسەر گوندی رەشاد ماڵ و حاڵی خۆیان جێھشتووە و ئاوارەبوون و گوتی: "ئەو خێزانانە لە ترسی ئەوەی کاردانەوەی توند بەرامبەریان ئەنجام بدرێت، ئاوارەبوون".

پارێزگاری دیالە، موسەننا تەمیمی سەبارەت بە مەترسییەکانی رێکخراوی تیرۆریستیی داعش لە ناوچەکانی نێوان پارێزگاکانی کەرکووک و دیالە، ئاشکرای کردووە کە زیاتر لە ھەزار چەکداری داعش لە میحوەری کەرکووک، دیالە و سەڵاحەددین بوونیان ھەیە و گوتی:

"بەم دواییانە، ژمارەی چەکدارانی داعش لەو میحوەرەوە زیادی کردووە".

ئێوارەی رۆژی سێشەممە، ژمارەیەک چەکداری رێکخراوی تیرۆریستی داعش هێرشیان کردە سەر گوندی رەشاد سەربە قەزای میقدادییە دووەم گەورە شاری سەربە پارێزگای دیالە و بەپێی داتاکانی سوپای عێراق، لەو هێرشەدا ١١ کەس کوژران، بەڵام سەرچاوەیەکی پزیشکیی بە ئاژانسی ئانادۆڵوی راگەیاند، لەو هێرشەدا ١٥ کەس کوژراون و ١٣ ی دیکە برینداربوون.

دوای ئەو هێرشە، سەدان چەکداری شیعە لە گوندی رەشادەوە هێرشیان کردە سەر خەڵکی گوندی "نەهر ئیمام" کە دانیشتوانەکەی سوننە مەزهەبن، ئەمەش وەک تۆڵەسەندنەوەیەک بووە لە بەرامبەر کوژرانی منداڵ و کەسوکاریان لەلایەن داعشەوە. بەهۆی ئەو هێرشەوە هەشت کەس لەدانیشتوانی گوندی نەهر ئیمام کوژران و ئاگر لە خانوو و کێڵگە کشتوکاڵییەکانیان بەردرا.

وێڕای ئەوەی عێراق لە ساڵی ٢٠١٧دا سەرکەوتنی بەسەر رێکخراوی تیرۆریستی داعش و کۆنترۆڵ کردنەوەی تەواوی رووبەری ئەو خاکەی کە رێکخراوەکە لە ھاوینی ٢٠١٤دا دەستی بەسەردا گرت، راگەیاند، بەڵام تاوەکو ئێستا رێکخراوەکە لە رێگەی پاشماوە و شانە نووستووەکانی ناو بەناو کردەی تیرۆریستی ئەنجام دەدات بەتایبەت لە ناوچەی نێوان پارێزگاکانی کەرکووک و سەڵاحەددین (باکوور) و پارێزگای دیالە (رۆژھەڵات)، کە بە "سێگۆشەی مەرگ" ناودەبرێت.