"سەدا ٣٥ی زیندانییان هەوڵی خۆکوشتنیان داوە"

هەولێر - AA

سەرۆکی تۆڕی دادپەروەری بۆ بەندییەکان لە عێراق، شوان سابیر رایگەیاند کە تاوانباری دووبارە و سێ بارە لە بەندیخانەکاندا هەیە.

شوان سابیر لە کۆنگرەیەکی رۆژنامەوانییدا، پوختەی ئەنجامی سەردانەکانی تۆڕی دادپەروەری بۆ پارێزگاکانی عێراق و هەرێمی کوردستان خستەڕوو و تیایدا ئاماژەی بە خاڵە ئەرێنیی و نەرێنییەکانی ناو بەندیخانەکان کرد.

سەرۆکی تۆڕی دادپەروەری بۆ بەندییەکان لە عێراق، شوان سابیر گوتی: "بەپێی راپۆرتی ئامادەکاری بەدواداچوون بۆ رەوشی زیندانییان لە کوردستان و عێراق، بەندیخانەکانی عێراق زۆر جەنجاڵن کە هەشت تا ١٠ بەرامبەر توانای خۆی زیندانی تیادایە و سەدا ٨٠ی باڵەخانەی گرتووخانەکان شیاوی ژیانی زیندانییان و دامەزراوەی چاکسازی نین لە رووی رووبەر و گونجانەوە".

شوان سابیر گوتیشی: "بەڕێژەی سەدا ١٠٠، چاکسازییەکانی کوردستان و عێراق، پۆڵێنی تاوانکاریی تیادا نییە و بەڕێژەی سەدا ٣٥ی زیندانییان هەوڵی خۆکوشتنیان داوە".

شوان سابیر ئاشکرایشی کرد کە سەدا ٣٥ی زیندانییان بەتۆمەتی بەکارهێنان و بازرگانییکردن بەماددەی هۆشبەر سزا دراون و لە کۆی گیراوانیش سەدا ٩٥ی حاڵەتی دووبارە و زیاتری تیادایە کە پێشتر بەماددەی جیاجیاوە گیراون و ئازادکراون و دووبارە تاوانکارییان ئەنجامداوەتەوە و ئەمەیشی بە شکستی پڕۆسەی چاکسازی لەناو گرتووخانەکاندا وەسفکرد.

سەرۆکی تۆڕی دادپەروەری بۆ بەندییەکان لە عێراق، شوان سابیر لەبارەی خاڵە ئەرێنییەکانی ناو بەندیخانەکان گوتی: "سەدا ٩٧ی شوێنەکان بە رووی رێکخراوە ناوخۆیی و نێودەوڵەتییەکاندا کراونەتەوە، سەدا ١٠٠ی زیندانییان بە یاسایی لە بەندیخانەکاندان و لە ھەموو بەندیخانەکان پێداویستی پاک و خاوێنی دابینکراوە و خواردنی زیندانییان لەسەر ئەرکی دەوڵەت دابین دەکرێت، سەرەڕای پەیڕەوکردنی ئازادی ئایین، تیمی تەندروستی و توێژەری کۆمەڵایەتیشیان هەیە".

بەپێی سەرۆکی تۆری دادپەروەری بۆ بەندییەکان لە عێراق، چاکسازییەکانی کوردستان باشترن لە چاکسازییەکانی ناوەراست و خوارووی عێراق لەڕووی باڵەخانە و خواردن و خزمەتگوزاری تەندروستییەوە.

تۆڕی دادپەروەری بۆ بەندییەکان لە عێراق سەردانی گرتووخانەکانی هەرێمی کوردستان و ١٥ پارێزگای دیکەی عێراقی کردووە و لە نزیکەوە چاودێری رەوشی زیندانییانی کردووە و ساڵانەش لە راپۆرتێکدا دەرەنجامی چاودێری و سەردانەکانییان دەخەنەڕوو.