دۆزینەوەی گۆڕێکی بەکۆمەڵ لە نەینەوا ڕاگەیاندرا

ھەولێر ــ AA

شانەی ڕاگەیاندنی ئەمنی عێراق ڕایگەیاند، ھێزە ئەمنییەکان گۆڕێکی بەکۆمەڵیان لە قەزای تەلەعفەر ڕۆژئاوای پارێزگای نەینەوا دۆزیوەتەوە کە ڕووفاتی ١٤ کەسی لەخۆگرتووە و سەرجەمیان لەلایەن تیرۆریستانی داعشەوە کوژراون.

شانەی ڕاگەیاندنی ئەمنی لە ڕاگەیاندراوێکدا ئاماژەی بەوەداوە کە دوای ئەوەی لە ڕێگای ھاوکاری ھاووڵاتییانەوە، زانیاریی لەبارەی بوونی گۆڕێکی بە کۆمەڵ لە گەڕەکی سەعد لە قەزای تەلەعفەر بە ھێزە ئەمنییەکان گەیشتبوو، ھێزێکی ھاوبەش لە فەوجی دوو سەربە لیوای ٧٣ی پیادە و فیرقەی ١٥ و ھێزەکانی حەشدی شەعبی دەستیان بە ھەڵمەتێکی گەڕان کرد لە شوێنەکەدا و گۆڕێکی بەکۆمەڵیان دۆزییەوە کە پێشتر لەکاتی دروستکردنی بناغەی قوتابخانەیەک دەستنیشان کرابوو".

ڕاشیگەیاندووە کە گۆڕە بەکۆمەڵەکە، ڕووفاتی ١٤ کەسی لەخۆگرتووە و پێشتر سەرجەمیان لەلایەن تیرۆریستانی داعشەوە کوژراون.

لە ڕاگەیاندراوەکەدا هەروەها جەخت لەوەش کراوەتەوە کە ڕێکاری یاسایی لەوبارەیەوە گیراوەتەبەر و ڕووفاتەکان بە مەبەستی ناسینەوەیان، ڕادەستی لایەنی پەیوەندیدار دەکرێن.