دھۆک - AA

زیاتر لە ١١ ساڵە ژمارەیەکی زۆر لە پەنابەرانی سووریا لە کەمپەکانی ھەرێمی کوردستان دەژین، ئەوان باس له‌ بێهیوابوونیان ده‌كه‌ن لە گەڕانەوە بۆ زێدی خۆیان و ئاماژه‌ به‌وه‌ ده‌كه‌ن كه‌ ئیتر لە ھەرێمی کوردستان دەستیان بە کار و كه‌سابه‌ت کردووە.

دۆخی ناسەقامگیری سووریا لە لایەک و زبروزەنگەکانی پەکەکەش لە لایەکی دیکەوە، ئەو پەنابەرانی بێ هیوا کردووە لە گەڕانەوە بۆ زێدی خۆیان.

په‌نابه‌ر شوان عەلی کە خەڵکی شاری قامشلۆیە و ئێستا لە کەمپی دۆمیزی سەربە شاری دھۆک دەژی، له‌ چاوپێكه‌وتنێكدا له‌گه‌ڵ ئاژانسی ئانادۆڵو وێڕای ئاماژه‌دان به‌وه‌ی لە ساڵی ٢٠١١وه‌ ئاوارەی سنووری پارێزگای دھۆک له‌ ھەرێمی کوردستان بووه‌، گوتی: "لە سووریا ژیان زۆر قورس بووە، ئێمە ئیتر بێھیوابووین لە گەڕانه‌وه‌ بۆ زێدی خۆمان، ئەگەر بشگەرێمەوە ئەو ئیشەی من دەیکەم، ناتوانم خێزانەکەمی پێ بەخێو بکەم. ئەگەر بزانین ئاسایش له‌ سوورریا بەرقەرارە و ھەلی کار هه‌یه‌، خوازیارین بگەڕێینەوە".

لە سنووری پارێزگای دھۆک ٢٠ کەمپ هەیە، پێنج لەوانە کەمپی پەنابەرەکانی سووریان کە بریتین له‌ ھەریەک لە کەمپەکانی دۆمیزی یەک، دۆمیزی دوو، بەردەڕەش، گەوێلان و ئاکرێ.

په‌نابه‌ر ئەیاد حسێن عەلی یه‌كێكی دیكه‌یه‌ له‌وانه‌ی په‌نایان بۆ هه‌رێمی كوردستان هێناوه‌، ئه‌و گله‌یی لە خراپی دۆخی سووریا دەکات له‌ لێدوانێكدا بۆ ئاژانسی ئانادۆڵو گوتی: "نەبوونی سەقامگیری و بەردەوامبونی کردەوەی تیرۆریستی و شەڕ و ئاڵۆزیی لە سووریا بووه‌ته‌ ھۆی ئەوەی نەتوانین بگه‌ڕێینه‌وه‌. پەکەکەش یەکێکه‌ لەو ھۆکارەکانه‌ی کە پەنابەرانی سووریا، ئەوانەی لە ھەرێمی کوردستان نیشتەجێن‌، نەتوانن بگەڕێنەوە، چونکە پەکەکە لە سووریا خەڵکی دەباتە سەربازی زۆرەمڵێ و شەڕیان پێدەکات. بۆیە من ھەتا پێم بکرێت ناگەڕێمەوە و دایک و باوکییشم دەھێنمه‌ ھەرێمی کوردستان و با ئەوانیش لە ناو کەمپەکاندا بژین".

هاوكات په‌نابه‌ر، محەمەد عەلی كه‌ له‌ کەمپی دومیز ده‌ژی گله‌یی لە ھاوکارییەکانی رێکخراوە نێودەوڵه‌تییه‌كان ھەیە و له‌ لێدوانێكدا رایگه‌یاند: "رەوشمان باش نییه‌، رێکخراوە نێودەوڵەتییەکان زۆر ھاوکار نیین، پێشتر لانیكه‌م سەبەتەی خۆراکیان پێده‌داین به‌ڵام ئەویش بڕدراوە. کە رێکخراوەکان دێن و تەماشای خانووه‌کانمان دەکەن و ئۆتۆمبێلەکانمان دەبینن، دەڵێن پەنابەری سووریا ھەموو دەوڵەمەندن. نازانن ئێمە ھەموو زه‌وی و موڵك و خانوومان لە سووریا فرۆشتووە و لێره‌ ئەو پارەیه‌مان ساخكردووه‌ته‌وه‌".

زیاتر لە ١٠٠ رێکخراوی هاوكاریی مرۆیی بۆ یارمەتیدانی ئاوارە و پەنابەران لە ھەرێمی کوردستان ھەن کە زۆربەیان رێکخراوی نێودەوڵەتین.

لە دەسپێکی جەنگی سووریاوە له‌ ساڵی ٢٠١١، سەدان خێزانی سووری پەنایان بۆ ھەرێمی کوردستان هێناوه‌، بەشێکیان لە کەمپەکاندا دەژین و بەشێکی دیکەشیان ژیانێکی نوێیان لە ناو شارەکاندا دەستپێکردووە.