کۆنگرەی رۆژنامەوانی گوتەبێژی یەکێتیی نیشتمانی کوردستان

سلێمانی ـ AA

کۆبوونەوەی مەکتەبی سیاسی یەکێتیی نیشتمانی کوردستان بەسەرپەرشتی جێگری سکرتێری گشتی حزبەکە، کۆسرەت رەسول عەلی لە بارەگای مەکتەبی سیاسی ئەو حزبە لە شاری سلێمانی بەڕێوەچوو، دوای کۆبوونەوەکەش گوتەبێژی فەرمی حزبەکە لە کۆنگرەیەکی رۆژنامەوانیدا ناوەڕۆکی کۆبوونەوەکەی باسکرد.

گوتەبێژی یەکێتیی نیشتمانی کوردستان، سەعدی ئەحمەد پیرە گوتی: "لە کۆبوونەوەکەدا بە وردی باس لە دۆخی خەڵک و دۆخی ئەمنی و ئەو کێشانەی تر، ھەروەھا بابەتی دووەم بابەتی پێکھێنانی حکوومەتی ھەرێم کە لە کۆبوونەوەی رۆژی 5ی مانگی رابردوو لەو رێکەوتنامەی ھەمانبوو لە سێ خاڵ پێکھاتبوو کە ئەوانیش بریتی بوون لە ئامادەکردنی وەرەقەیەکی سیاسی بۆ چوارچێوەی پێکەوە کارکردنی یەکێتی لەناو حکوومەت و پەرلەمان لە ماوەی ساڵانی داھاتوودا کە لەسەری رێک دەکەوین، ئەم وەرەقەیەش بابەتی دارایی و ئابووری لە ھەرێم بەشێوەیەک بێت لە بەرژەوەندی ھەرێم و خەڵک بێت، لەھەمانکاتیشدا قسە لەسەر ئەوە کرا کە تەنھا سەرچاوەکانی نەوت بەس نییە و پێویستە کابینەی نوێی حکومەت وا بکات سێکتەرەکانی تر چالاک بکاتەوە تا حکوومەت ئەلتەرناتیڤی ھەبێت لەکاتی گۆڕانکاری لە نرخی نەوت لە بازاڕەکانی جیھاندا".

سەعدی پیرە گوتی: "بابەتی دووەم کە لەناو وەرەقە سیاسییەکە ھەیە بابەتی یەکخستنی ھەڵوێستە سەبارەت بە ناوچەکە و عێراق و وڵاتانی دەرەوە و جیھانی، ناکرێت یەکێتی و پارتی ھەریەک لە ئاوازێک بخوێنن بەرامبەر ئەو پێشھاتانەی دێنە پێشەوە، پێویستە لایەنەکانی تریش کە بەشداری حکوومەت دەکەن ھەمووان پێکەوە کۆک بین".

سەعدی پیرە ھەروەھا گوتی: "بابەتی سێھەمی نێو وەرەقەکە بابەتی پێشمەرگە و دۆخی ئەمنییە کە پێویستە کار بکەین بۆ یەکخستنی ھێزی پێشمەرگە و کردنیان بە ھێزێکی نیشتمانی و نەتەوەیی و جوڵاندنی ئەو ھێزە بە ئاگاداری پەرلەمان و حکوومەت بێت، ھەروەھا گرنگە لە پرسی ئاسایش و پۆلیسیش دوور لە پێناسی حزبی و سیاسی مامەڵە لەگەڵ ھاووڵاتی بکرێت".

گوتەبێژەکەی یەکێتی باسی لەوەش کرد، لە پەیوەندییە دیپلۆماسی و نێودەوڵەتییەکان دەبێت ئەو پەیوەندییانە ھاوسەنگ بێت و سیمای ھاوبەشی راستەقینەی پێوە دیاربێت، لە پەیوەندی لەگەڵ عێراق و وڵاتانی دراوسێ و جیھانیش پەیوەندییەکی ھاوسەنگ بێت و ئاستی فەرمانگەی پەیوەندییەکانی دەرەوەش بەرز بکرێتەوە.

ئەو لەبارەی پرسی کەرکووک گوتی: "لە رێکەوتنمان لەگەڵ پارتی دیموکراتی کوردستان باسمان لەوە نەکردووە کە ئەنجوومەنی پارێزگای کەرکوک لە ھەولێر کۆدەبێتەوە و ئەوە بە ھەڵە ھاتووە، ئەنجومەنی پارێزگا خۆی بڕیار دەدات لە کوێ کۆدەبێتەوە و ئەوە کاری یەکێتی و پارتی نییە بڕیار لەسەر شوێنی کۆبوونەوەکە بدەن، ھەروەھا لیستی برایەتی بۆ خۆی دەتوانێت بڕیار لەو بارەیەوە بدات".

سەعدی پیرە باسی لەوەش کرد، لە کۆبوونەوەی ١٨ی ئەم مانگەی پەرلەمان ھەنگاوی یەکەم ھەڵبژاردنی دەستەی سەرۆکایەتی پەرلەمان دەبێت بەوەش کلیلەکە دەکرێتەوە و ئەوکاتە ھەموارکردنەوەی یاسای سەرۆکایەتی ھەرێم و دەستنیشانکردنی شێوازو رێسای ھەڵبژاردنەکە دیاری دەکرێت، پاش ئەوە پەرلەمان بەربژێری گەورەترین لیستی پەرلەمانی بۆ پێکھێنانی حکوومەت رادەسپێرێت و سەرۆکی ھەرێمیش پەسەندی دەکات.

بەگوتەی سەعدی پیری دوای ئەو ھەنگاوانە دەچنە سەر دیاری کردنی وەزارەتەکان و بەربژێری ئەو وەزارەتانە.

لە وەڵامی پرسیاری رۆژنامەنووساندا، گوتەبێژی یەکێتی گوتی: "پۆستی سەرۆکی پەرلەمان تائێستا لەلایەن یەکێتی کاندیدەکەی یەکلا نەکراوەتەوە و لە کۆبوونەوەی سەرکردایەتی یەکێتی یەکلا دەکرێتەوە، ھەروەھا کاندیدی ئێمەش بۆ پۆستی پارێزگاری کەرکووک لە کۆبوونەوەکانی داھاتوو یەکلا دەکرێتەوە".