کۆبوونەوەی ھەفتانەی ئەنجوومەنی وەزیرانی ھەرێمی کوردستان

ھەولێر- AA

ئەمڕۆ چوارشەممە، ئەنجوومەنی وەزیرانی ھەرێمی کوردستان بە سەرپەرشتی سەرۆکی ئەنجوومەنی وەزیران، مەسرور بارزانی و ئامادەبوونی جێگری سەرۆکی ئەنجوومەنی وەزیران، قوباد تاڵەبانی کۆبوونەوەی ھەفتانەی خۆی ئەنجامدا .

لە سەرەتای کۆبوونەوەکەدا ، سەرۆکی ئەنجوومەنی وەزیران تیشکی خستە سەر سەردانیی ھەفتەی رابردووی جێگری سەرۆکی ئەمەریکا، مایک پێنس بۆ ھەولێر کە دووپاتکردنەوەی رۆڵی گرنگی ھەرێمی کوردستان بوو لە ناوچەکەدا .

دواتر گفتوگۆ دەربارەی ئەنجامی کۆبوونەوەکانی شاندی دانوستاندنی حکوومەتی ھەرێمی کوردستان لە بەغدا کرا کە بە راسپاردە و سەرپەرشتی راستەوخۆی سەرۆکوەزیران بوون. ئەندامانی شاندەکە دوایین پێشکەوتنەکانی رەوشی دانوستاندن و گفتوگۆی نێوان حکوومەتی ھەرێمی کوردستان و حکوومەتی فیدراڵی خستەڕوو. ئەنجوومەنی وەزیران خۆشحاڵی خۆی نیشاندا بە بەرەوپێشچوونی گفتوگۆکان بە ئاراستەی رێککەوتن لە سەر پڕۆژە بوودجەی فیدراڵ بۆ ٢٠٢٠ کە ئێستا لە قۆناغی ئامادەکردندایە لە لایەن وەزارەتی دارایی عیراق. ئەنجوومەنی وەزیران جەختی لە پابەندییەکانی ھەرێمی کوردستان کردەوە لە بەرامبەر دابینکردنی تەواوی ماف و شایستە داراییەکانی ھەرێمی کوردستان بە رەچاوکردنی بەرژەوەندی گشتیی ھاوبەشی ھەردوولا.
بڕیاریشە لە سەرەتای ھەفتەی داھاتوو شاندی دانوستاندکار سەردانی بەغدا بکاتەوە .

پاشان وەزیری دارایی و ئابووری، ئاوات شێخ جەناب راپۆرتێکی خستەڕوو ، دەربارەی میکانیزمی جێبەجێکردنی بڕیاری ئەنجومەنی وەزیران تایبەت بە رێکخستن و یەکخستنەوە و گەڕاندنەوەی سەرجەم داھاتەکان بۆ وەزارەتی دارایی و ئابووری و پێداچوونەوەی تەرخانکراوی خەرجییەکان لە سەر بنەمای پێداویستی و کارە لە پێشینەکان . ئەنجوومەنی وەزیران راپۆرتەکەی پەسەند کرد و وەزارەتی دارایی و ئابووری راسپارد کە رێکاری پێویست بۆ کەمکردنەوەی رۆتینی خەرجکردنی پێشینەی وەزارەتەکان بگرێتەبەر، بە جۆرێک ئاسانکاری بکرێت بۆ ئەوەی بتوانن کار و پرۆژەکانیان راپەڕێنن لە چوارچێوەی تایبەتمەندی و دەسەڵاتەکانیان.

پاشان وەزیری شارەوانی و گەشتوگوزار، ساسان عەونی چەند روونکردنەوەیەکی پێویستی دەربارەی پڕۆژەی پێوەری ئاوی ماڵان خستەڕوو ، ئاماژەشی بەوەدا کە رۆژانە (٢.١ ملیۆن مەتر سێجا ) ئاوی شیرین بەرھەم دەھێنرێت، کە تێچووی گشتیی رۆژانە لە سەر حکوومەت ( ٨٤٠ ملیۆن دینارە) ، بەداخەوە رۆژانە ( ٨٥٠ ھەزار مەترسێجا) ئاوی پاکی خواردنەوە بە فیرۆ دەدرێت کەتێچووەکەی رۆژانە دەکاتە ( ٣٤٠ ملیۆن دینار) و ساڵانە زیاتر لە ١٢٤ ملیار دینارە ، ئەمەش دەبێتە بەفیرۆچوونی ٤٠ مێگاواتی کارەبای رۆژانە . ئەنجوومەنی وەزیران پشتگیریی بەردەوامبوونی پڕۆژەی دانانی پێوەری ئاوی ماڵان دەکات ، داواش لە ھاووڵاتیان دەکات کە بەرپرسیارێتی پاراستنی ئاو لە ئەستۆبگرن کە سامانێکی نیشتمانییە، سنوورێکیش بۆ بەفیڕۆدانی ئاو دابنرێت، چونکە خەرجییەکی زۆر لە سەر حکوومەت دەکەوێت.

لە کۆتاییدا وەزیری کارەبا، کەمال محەمەد ساڵح روونکردنەوەی پێویستی بە داتا و زانیاری دا لە بارەی کەمبوونەوەی کاتژمێرەکانی پێدانی کارەبای نیشتمانیی بە ھاووڵاتیان کە لە ئەنجامی بەکارھێنانی کارەبای زیاتر بەھۆی وەرزی زستان و زیادەڕۆیی بۆ سەر تۆڕی کارەباوە دروست بووە. وەزیری کارەبا ئاماژە بە ھەوڵەکانی وەزارەتەکەی دا لەمبارەیەوە ، ئەنجوومەنی وەزیرانیش بڕیاریدا لە کۆبوونەوەی داھاتوو گفتوگۆی زیاتر لە سەر پرسی کارەبا بکات.