پارتی و یەکێتی لەسەر دیاریکردنی پارێزگاریکی کورد بۆ کەرکووک رێککەوتن

ھەولێر – AA

ئەمڕۆ یەکشەممە، پارتی دیموکراتی کوردستان و یەکێتیی نیشتمانیی کوردستان لەسەر ئاستی مەکتەبی سیاسی بۆ تاوتوێکردنی پێکھێنانی حکوومەتە خۆجێیەکان لە کەرکووک و نەینەوا، ھەروەھا پرسی ھەڵبژاردنی پەرلەمانی کوردستان-عێراق لە دەباشان کۆبوونەوە.

دوای کۆتایی ھاتنی کۆبوونەوەکە، پارتی دیموکراتی کوردستان و یەکێتیی نیشتمانیی کوردستان راگەیەندراوێکی ھاوبەشیان بڵاوکردەوە و تیایدا ئاماژەیان بەوەداوە کە ئەمڕۆ، پارتی دیموکراتی کوردستان و یەکێتیی نیشتمانیی کوردستان لەسەر ئاستی مەکتەبی سیاسی ھەردوو حزب لە دەباشان ئەنجام درا.

ئاماژەیان بەوەشداوە کە لە کۆبوونەوەکەدا، گفتوگۆکراوە لەبارەی دۆخی سیاسی و ئابووری ھەرێم و کێشەچارەسەر نەکراوەکان لەگەڵ حکوومەتی فیدڕالی لەنێویاندا، بوودجە، بژێوی ژیان و مووچەی فەرمانبەران بە تایبەتی، ھەروەھا ھەڵبژاردنەکانی ئەنجوومەنی پارێزگاکان.

ئەوشیان خستووەتەڕوو: "لە میانی کۆبوونەوەکەدا، دوای بیروڕا گۆڕینەوە و لەبەرچاوگرتنی بەرژەوەندی باڵای نەتەوەیی و نیشتمانیی ھاوڕابووین لەسەر ئەوەی کە ھەردوولا کۆک بووین لەم قۆناغەدا لەپێناو بەرژەوەندی ھاووڵاتییانی پارێزگای کەرکوک بە ھەموو پێکھاتەکانیەوە پارێزگارێکی کورد دیاری بکرێت بۆ خزمەتی خەڵکی شارو شارۆچکەکان".

ڕاشیانگەیاندووە: "لە کۆبوونەوەکەدا، ھەروەھا ھەردوولا ھاوڕابووین ئەرکی سەرشانی یەکێتی و پارتی و سەرجەم لایەنە کوردستانییەکانە قەوارەی ھەرێم بپارێزن و پارێزگاری لە دەستکەوتەکانی شۆڕش و خەبات و خوێنی شەھیدانی کوردستان بکەین" .

ھەروەھا لە ڕاگەیاندراوەکەدا، ھاتووە: "بۆ چارەسەری کێشە سیاسی و ئابوورییەکانی ھەرێم لەگەڵ حکوومەتی فیدڕاڵی لەئاستێکی باڵا ھەردوولا پێکەوە ھەوڵی چارەسەرکردنی کێشەکان بەگشتی بژیوی ، ژیان و خزمەتگوزاری، بودجە و مووچە بدەین بە تایبەتی".

لە ساڵی ٢٠٢٤دا و دوای ئەنجامدانی ھەڵبژاردنی ئەنجوومەنی پارێزگاکانی عێراق کە لە ١٨ی مانگی کانوونی یەکەمی ساڵی ڕابردوو بەڕێوەچوو، ئەمە یەکەمین کۆبوونەوە بوو کە لەنێوان ھەردوو مەکتەبی سیاسیی پارتی و یەکێتی ئەنجام بدرێت.