هۆشیار زێباری:"ئه‌و شانده‌ی ده‌چێته‌ به‌غدا بۆوه‌رگرتنی ره‌زامه‌ندیی عێراق نییه‌ له‌سه‌ر ریفراندۆم"

هه‌ولێر-AA
زێباری ده‌ڵێت ئێمه‌ له‌به‌رده‌م تاقیكردنه‌وه‌یه‌كی مێژووییداین و ره‌نگه‌ لێدوان و فشاریشمان له‌سه‌ر بێت، به‌ڵام ده‌بێت مكوڕبین له‌سه‌ر بڕیاری خۆمان.
ئه‌مڕۆ سێشه‌ممه‌ یه‌كێتی لاوانی دیموكراتی كوردستان پانێلێكی به‌ناونیشانی "به‌ره‌و سه‌ربه‌خۆیی" بۆ هه‌ریه‌ك له‌ نوێنه‌ری پارتی دیموكراتی كوردستان له‌ لێژنه‌ی باڵای ریفراندۆم، هۆشیار زێباری و ئه‌ندامی مه‌كته‌بی سیاسیی یه‌كێتی نیشتمانی كوردستان، سه‌عدی ئەحمەد پیره‌ و ئه‌ندامی مه‌كته‌بی سیاسیی یه‌كگرتووی ئیسلامیی كوردستان خه‌لیل ئیبراهیم و سكرتێری حزبی شیوعی كوردستان، كاوه‌ مه‌حمود له‌ هۆتێل رۆتانا له‌ شاری هه‌ولێر رێكخست.
نوێنه‌ری پارتی دیمنوكراتی كوردستان، هۆشیار زێباری له‌و پانێڵه‌دا گوتی "ریفراندۆم و دیاریكردنی مافی چاره‌ی خۆنووسین له‌هه‌موو رێككه‌وتنه‌ نێوده‌وڵه‌تییه‌كان و له‌ میساقی نه‌ته‌وه‌یه‌كگرتووه‌كان و هه‌موو یاسا و ده‌ستووره‌كانی دونیادا هاتووه‌، هیچ وڵاتێكی دیموكراسی له‌ دونیا ناتوانێت بڵێت من دژی ریفراندۆم یان دژی دیاریكردنی چاره‌نووسی میلله‌تێك ده‌كات له‌لایه‌ن خۆیانه‌وه‌".

گوتیشی هه‌ر وڵاتێكی دیموكراسی دژی بێت ئه‌وا دژی پڕەنسیپ و ده‌ستوور و یاساكانی خۆی ده‌بێت".

زێباری له‌ درێژه‌ی قسه‌كانیدا وه‌كو نوێنه‌ری حزبه‌كه‌ی روونیشی كرده‌وه‌ "هیچ كاتێكی نموونه‌یی نییە كه‌ هه‌موو شتێك به‌رده‌ست و گونجاو بێت، به‌ڵام ریفراندۆم یارمه‌تیی ئێمه‌ ده‌دات چاره‌سه‌ری كێشه‌كانی ناوماڵی خۆمان بده‌ین، كاراكردنه‌وه‌ی په‌رله‌مان و به‌شداریی كردنی حزبه‌كان له‌حكوومه‌ت، بۆیه‌ دانوستانه‌كانی ئه‌مدواییه‌ به‌تایبه‌ت له‌نێوان یه‌كێتی و پارتی ئه‌وه‌ی لێ كه‌وتووه‌ته‌وه‌ كه‌ پێشنیازمان كردووه‌ با په‌رله‌مان كارابكرێته‌وه‌ و وه‌زیره‌كانی گۆڕان بگه‌ڕێنه‌وه‌ و ده‌ست به‌كاره‌كانییان بكه‌نه‌وه‌".

هه‌روه‌ها گوتیشی "مه‌رج نییه‌ په‌رله‌مان کارا بکرێتەوە و یاسا ده‌ربكرێـت بۆ ئه‌وه‌ی ریفراندۆم بكه‌ین، ریفراندۆم بڕیارێكی سیاسییه‌، به‌ڵام ده‌بێت په‌رله‌مان كارابكرێته‌وه‌ بۆ ئه‌وه‌ی نه‌بێته‌ پەڵە له‌سه‌ر هه‌رێمی كوردستان، مه‌سه‌له‌ی ریفراندۆم وابزانم په‌رله‌مانی كوردستان كۆمیسیۆنی باڵای به‌ یاسا دامه‌زراند و ناوی ریفراندۆمیشی له‌سه‌ر بوو".

زێباری تیشكی خسته‌ سه‌ر په‌یوه‌ندی نێوان هه‌رێم له‌گه‌ڵ به‌غدا و رایگه‌یاند "بڕیاره‌ شآندێکی باڵای هه‌رێم سه‌ردانی به‌غدا بكه‌ن، به‌ڵام بۆ ئه‌وه‌ نییه‌ ره‌زامه‌ندیی به‌غدا وه‌ربگرین، به‌ڵكو بۆ ورده‌كاریی و چۆنێتی ئه‌نجامدانی و شتی دیكه‌یه‌، هیچ بڕیارێك یان مادده‌یه‌كی ده‌ستووری نییه‌ رێگه‌ له‌ هه‌رێم بگرێت سه‌ربه‌خۆ بێت".

هۆشیار زێباری كه‌ ئه‌ندامی مه‌كته‌بی سیاسیی پارتی دیموكراتی كوردستانیشه‌ و پێشتر وه‌زیری دارایی و پێش ئه‌وه‌ش وه‌زیری ده‌ره‌وه‌ی عێراق بووه‌ بۆ ئاماده‌بووان گوتیشی "له‌ ده‌ستووری عێراقدا چه‌ندین جار باسی ریفراندۆم كراوه‌ له‌نێویاندا ئه‌وه‌ی په‌یوه‌سته‌ به‌ مادده‌ی 140ه‌وه‌، ئێمه‌ پاش 14 ساڵ له‌گه‌ڵ عێراق گه‌یشتووینه‌ته‌ ئه‌و قه‌ناعه‌ته‌ی كه‌ ئه‌و پابه‌ندبوونه‌ی به‌غدا جێبه‌جێ ناكرێت، ره‌نگه‌ كێشه‌كه‌ هه‌رێمیش تێیدا پشكی هه‌بێت، به‌ڵام به‌رپرسیارێتی سه‌ره‌كیی له‌سه‌ر حكوومه‌ته‌ عێراقه‌، بۆ نموونه‌ ئه‌نجامدانی سه‌رژمێری ده‌بوو كرابا، به‌ڵام نه‌یانكرد، ده‌ستووری عێراق بۆ نموونه‌ باس له‌ فیدڕاڵییه‌تی عێراق ده‌كات و باس له‌وه‌ش ده‌كات پێویسته‌ پابه‌ندی ئه‌م ده‌ستووره‌ ببین، به‌ڵام ئه‌مه‌ رووینه‌داوه‌".

گوتیشی "ئێمه‌ له‌به‌رده‌م تاقیكردنه‌وه‌یه‌كی مێژوویدایین و ره‌نگه‌ لێدوان و فشاریشمان له‌سه‌ر بێت، به‌ڵام ده‌بێت مكوڕبین له‌سه‌ر بڕیاری خۆمان، له‌ 1992 بڕیاری هه‌ڵبژاردن درا گاڵته‌یان پێده‌كردین كه‌ ناتوانیین ئه‌و كاره‌ بكه‌ین و هه‌موو وڵاتانی دونیا دژی ئێمه‌بوون و ده‌یانگوت ناتوانن و چه‌ندین كۆبوونه‌وه‌یان كرد بۆ ئه‌وه‌ی ئه‌زموونی هه‌رێم بخنكێنن، به‌ڵام ئێمه‌ هه‌ر سووربووین له‌سه‌ر بڕیاری به‌ره‌ی كوردستانی و ئه‌نجاممان دا".

هۆشیار زێباری له‌كۆتایی قسه‌كانیدا له‌ پانێلێی به‌ره‌و سه‌ربه‌خۆیی بۆ ئاماده‌بووان گوتیشی "ئامانجی ئێمه‌ له‌م سه‌ربه‌خۆییه‌ بۆ یه‌ك ئامانجه‌ ئه‌ویش دامه‌زراندنی ده‌وڵه‌تی كوردستانه‌، بۆ دیاریكردنی مافی چاره‌نووسی خۆمانه‌، به‌ڵام مه‌رج نییه‌ 25ی ئه‌یلول ئێمه‌ یه‌كسه‌ر ده‌وڵه‌ت دروست بكه‌ین، زۆر ورده‌كاریی ته‌كنیكی هه‌یه‌ بۆ ده‌وڵه‌ت، نامانه‌وێت ده‌وڵه‌ت به‌شه‌ڕ دروست بكه‌ین، ده‌مانه‌وێت به‌ وتوێژ ئه‌و كاره‌ بكه‌ین".