سه‌عدی پیره‌: "هه‌رێمی كوردستان له‌رووی دامه‌زراوه‌یی وئیداره‌ییه‌وه‌ ئاماده‌ی بوون به‌ ده‌وڵه‌ته‌"

هه‌ولێر-AA
سه‌عدی پیره‌ ده‌ڵێت بوونی ملیۆنه‌ها ئاواره‌ و ملیۆنه‌ها شه‌هید و بریندار و ئه‌و سه‌دان ملیاره‌ی رۆیشتووه‌ له‌ ئه‌نجامی سایكس بیكۆ بووه‌.

ئه‌مڕۆ سێشه‌ممه‌ یه‌كێتی لاوانی دیموكراتی كوردستان پانێڵێكی به‌ناونیشانی "به‌ره‌و سه‌ربه‌خۆیی" بۆ هه‌ریه‌ك له‌ نوێنه‌ری پارتی دیموكراتی كوردستان له‌ لێژنه‌ی باڵای ریفراندۆم، هۆشیار زێباری و ئه‌ندامی مه‌كته‌بی سیاسیی یه‌كێتی نیشتمانی كوردستان، سه‌عدی ئەحمەد پیره‌ و ئه‌ندامی مه‌كته‌بی سیاسیی یه‌كگرتووی ئیسلامیی كوردستان خه‌لیل ئیبراهیم و سكرتێری حزبی شیوعی كوردستان، كاوه‌ مه‌حمود له‌ هۆتێل رۆتانا له‌ شاری هه‌ولێر رێكخست.

ئه‌ندامی مه‌كته‌بی سیاسیی یه‌كێتی نیشتمانی كوردستان، سه‌عدی ئه‌حمه‌د پیره‌ له‌و پانێڵه‌كه‌دا رایگه‌یاند "ئه‌وانه‌ی پێیانوایه‌ له‌رووی دامه‌زراوه‌یی و ئیداره‌ییه‌وه‌ ئێمه‌ ئاماده‌نیین ئه‌وان هه‌ڵه‌ن، ئێمه‌ ملیۆنێك و 700 هه‌زار ئاواره‌مان هه‌یه‌ و ئیداره‌مان داوه‌، ره‌نگه‌ ئه‌مه‌ له‌ وڵاتێكی ئه‌ورووپی بایه‌ هاواریان لێ هه‌ڵده‌ستا، ئه‌وانه‌ی وا ده‌ڵێن با بێن دوو هه‌فته‌ له‌ هەریمی كوردستان بژیین ده‌زانن قسه‌كانییان وا نییه‌".

سه‌عدی ئه‌حمه‌د پیره‌ گوتیشی "قسه‌كردن له‌گه‌ڵ به‌غدا و وتوێژ له‌گه‌ڵیاندا، هه‌روه‌ها كاراركردنه‌وه‌ی په‌رله‌مان و ناردنی شانده‌كان بۆ وڵاتانی دونیا بۆ شیركردنه‌وه‌ی ریفراندۆم بۆ ئه‌وه‌ی به‌هه‌ڵه‌ تێنه‌گه‌ن، ئه‌مانه‌ هه‌نگاوی زۆر گرنگه‌ و ده‌بێت ده‌ست و بردی لێ بكه‌ین".

گوتیشی" ئێمه‌ پێمان وایه‌ سیسته‌می پاشایه‌تی بۆ كورد خراپ بوو و کورد وه‌كو هاووڵاتی پله‌ دوو سه‌یر ده‌كرا، له‌ حوكمڕانیی سوننه‌كانیش هه‌روا بوو، له‌ سه‌رده‌می سه‌دام حوسێنیش كورد قڕده‌كرا، له‌ساڵی 2003ه‌وه‌ هه‌ر بۆ كورد هه‌مان ئه‌وه‌ی پێشووه‌، به‌ته‌نها جیاوازییه‌كه‌ی ئه‌وه‌یه‌ ئه‌وانی پێشتر نوێژیان نه‌ده‌كرد، ئه‌وانه‌ی ئێستا نوێژ ده‌كه‌ن، به‌تایبه‌ت ئێستا ئایینده‌ و به‌رنامه‌ی حه‌شدی شه‌عبی روون نییه‌ به‌تایبه‌ت بۆ كورد، بۆیه‌ ئێمه‌ له‌گه‌ڵ ئه‌و هه‌موو كێشانه‌ مافی خۆمانه‌ باسی سه‌ربه‌خۆیی بكه‌ین".

سه‌عدی پیره‌ له‌ درێژه‌ی قسه‌كانیدا بۆ ئاماده‌بووانی پانێڵه‌كه‌ كه‌ ژماره‌یه‌كی به‌رچاو له‌ كه‌سانی جیاواز ئاماده‌ی بوون له‌ په‌رله‌مانتار و مامۆستای زانكۆ و گه‌نجان و چالاكوانانه‌وه‌ گوتی: "هه‌ندێك گله‌یی له‌ هەرێمی كوردستاندا هه‌یه‌ كه‌ ره‌خنه‌ده‌گیرێت و هه‌ندێك باس ده‌خولێته‌وه‌ كه‌ زۆری له‌سه‌ر ده‌گوترێت، ئێمه‌ به‌نیازین پڕۆژه‌یه‌كمان له‌به‌رده‌ستدایه‌ بۆ ئه‌وه‌ی ناوماڵی کوردستانی رێكبخه‌ینه‌وه‌ و یه‌كێتی ریزه‌كانی گه‌ل بپارێزین".
گوتیشی: "هه‌ندێك له‌ راگه‌یاندنه‌كان كێشه‌ دروست ده‌كه‌ن و نا موه‌فه‌قن له‌ هه‌ڵبژاردنی بابه‌ته‌كان، ناكۆكییه‌كان و بیروڕا جیاییمان له‌سه‌ر جه‌دوه‌لی زه‌مه‌نی و هه‌نگاوه‌كانه‌ نه‌ك له‌سه‌ر خودی سه‌ربه‌خۆیی".

سه‌عدی پیره‌ گوتیشی: "ئێمه‌ له‌به‌رده‌م گۆاڕانكارییه‌كی گه‌وره‌داین، 100 ساڵ به‌سه‌ر سایكس بیكۆ تێپەڕیووە كه‌ به‌شی هه‌ره‌ زۆری وڵاتانی ناوچه‌كه‌ له‌ ئه‌نجامی ئه‌م رێككه‌وتننامه‌یه‌ پێكهێنراون، ده‌بیین ئه‌م وڵاتانه‌ به‌ زۆرینه‌ به‌پێی به‌رژه‌وه‌ندیی وڵاتانی زلهێز دامه‌زراون و خه‌ریكه‌ ده‌ته‌پێن، ئه‌وه‌تا له‌ تونس و مه‌غریب و یه‌مه‌ن و میسر خۆ كوردی لێ نییه‌ كه‌چی كێشه‌ی زۆریان هه‌یه‌، بۆیه‌ پێویسته‌ له‌دوای داعش كار له‌سه‌ر ئه‌وه‌ بكه‌ین له‌گه‌ڵ ناوه‌نده‌كانی هه‌واڵگری و ئایین و زانكۆ و ئه‌وانی تر كار بۆ وشككردنی سه‌رچاوه‌كانی توندڕه‌وی و تیرۆر بكه‌ین، هه‌روه‌ها بوونی ملیۆنه‌ها ئاواره‌ و ملیۆنه‌ها شه‌هید و بریندار و ئه‌و سه‌دان ملیاره‌ی رۆیشتووه‌ له‌ ئه‌نجامی سایكس بیكۆ بووه‌، بۆیه‌ پێویسته‌ جارێكی تر ناوچه‌كه‌ نه‌خشه‌ی بۆ دابڕێژرێته‌وه‌ له‌سه‌ر بنچینه‌ی به‌رژه‌وه‌ندییه‌كانی گه‌لانی ناوچه‌كه‌".

ئه‌ندامی مه‌كته‌بی سیاسیی یه‌كێتی نیشتمانی كوردستان، سه‌عدی ئه‌حمه‌د پیره‌ گوتیشی" ریفراندۆم هی هه‌موو تاكێكه‌ له‌ كوردستان هی كورد و مه‌سیحی و توركمان و شیعه‌ و سوننه‌ و عه‌ره‌ب و شه‌به‌ك و ئه‌وانی دیكه‌یه‌، نابێت رێگه‌ بده‌ین كه‌ ته‌نها ئه‌مه‌ وا نیشان بدرێت مه‌كره‌مه‌ی یه‌كێتی یان پارتییه‌ به‌ته‌نها".