نێچیرڤان بارزانی جەخت لە چاکسازیی وەزارەتی پێشمەرگە دەکاتەوە

ھەولێر ـ AA

سەرۆکی ھەرێمی کوردستان، نێچیرڤان بارزانی جەخت لە پرۆسەی چاکسازی لە وەزارەتی پێشمەرگە و ڕێکخستنەوەی پێشمەرگە دەکاتەوە، بۆ ئەم مەبەستە لایەنە پەیوەندارەکانی سەرۆکایەتیی ھەرێمی کوردستان و وەزارەتی پێشمەرگە ڕادەسپێرێت کە لیژنەی تایبەت بۆ بەدواداچوونی پرۆسەکە پێک بھێنن و ھەنگاوی کردەیی لە ڕێکخستنەوەی بوارەکانی کارگێڕی و یاسایی و داڕشتنەوەی پەیکەری وەزارەت و ھێز و پێکھاتەکانی پێشمەرگەدا بنرێن.

سەرۆکی ھەرێمی کوردستان، نێچیرڤان بارزانی و فەرماندەی گشتیی ھێزی پێشمەرگە، ئەمڕۆ دووشەممە لە سەرۆکایەتیی ھەرێمی کوردستان لەگەڵ وەزارەت و فەرماندە و پلەدارنی پێشمەرگە کۆبووەوە بۆ ئەوەی لە نزیکەوە ئاگاداری دوایین ھەنگاوەکانی پرۆسەی چاکسازی لە وەزارەت و ڕێکخستنەوەی پێشمەرگە بێت.

ماڵپەری سەرۆکایەتیی ھەرێم بڵاوی کردەوە، لە کۆبوونەوەکەدا کە جێگرانی سەرۆک و وەزیر و فەرماندە و پلەدارانی پێشمەرگە ئامادەی بوون، بە درێژی تاوتوێی ئەو ھەنگاوانە کرا کە لە چوارچێوەی پرۆسەی چاکسازیی وەزارەتی پێشمەرگەدا تا ئێستا بۆ یەکخستنەوەی پێشمەرگە نراون و تیشک خرایە سەر ئەو گیروگرفتانەی دێنە بەردەم پرۆسەکە، ھەروەھا چەندین پێنشیار و تێبینی بۆ خێراکردن و سەرکەوتنی پرۆسەکە خرانە ڕوو.

لە کۆبوونەوەکەدا سوپاسی ھاوکاری و پشتگیریی ھاوپەیمانان بەتایبەتی ئەمەریکا، بەریتانیا و ئەڵمانیا کرا کە بۆ سەرخستنی پرۆسەکە لە نزیکەوە لەگەڵ وەزارەتی پێشمەرگە کار دەکەن، ھەروەھا بڕیار درا کۆبوونەوەی دەوری بۆ بەدواداچوون و سەرخستنی پرۆسەکە ئەنجام بدرێن.