مستەفا کازمی: "ژمارەیەك بڕیاری تایبەتمان بۆ پاڵپشتیكردن لە پارێزگای زیقار دەركردووە"

هەولێر ــ AA

سەرۆكوەزیرانی عێراق، مستەفا كازمی رایگەیاند كە ژمارەیەك بڕیاری تایبەت و گرنگیان بۆ پاڵپشتیكردن لە پارێزگای زیقار دەركردووە و ئاماژە بەوەیش دەكات كە ئەو پارێزگایە دووچاری پەراوێزخستن بووەتەوە.

مستەفا كازمی دوای سەردانەكەی بۆ پارێزگای زیقار باشووری عێراق تویتێكی بڵاوكردەوە و نووسیوویەتی "زیقار خاوەن پێگەیەكی گرنگە لە بواری مێژویی و رۆشنبیریی كە بەداخەوە بەرەوڕووی پەراوێزخستن بووەتە، دیداری باشمان لەو پارێزگایە ئەنجامدا، هەروەها ژمارەیەك بڕیاری تایبەت و گرنگمان بۆ پاڵپشتیكردن لە پارێزگای زیقار دەركردووە".

ئەوەشی نووسیووە "باشی و جوامێری دانیشتوانی زیقار قوتابخانەیەكە بۆ نەوەكانی داهاتوو، سڵاو لە زیقار و دانیشتوانەكەی".

دوێنێ دووشەممە سەرۆكوەزیرانی عێراق، مستەفا كازمی سەردانی پارێزگای زیقار كرد كە لە میانیدا كۆبوونەوەی نائاسایی ئەنجوومەنی وەزیران لەو پارێزگایە سازكرا.