لیژنەی لامەرکەزیەتی سلێمانی لە کۆبوونەوەدایە

سلێمانی - AA

بەمەبەستی دەوڵەمەندکردنی رەشنووسی پرۆژەی لامەرکەزیەتی ئیداری و دارایی کە ئەنجوومەنی پارێزگای سلێمانی بەنیازە پێشکەش بە ئەنجوومەنی وەزیرانی هەرێمی کوردستانی بکات، ئەمرۆ ١٧ی ئایار لیژنەی ئامادەکردنی پرۆژەکە بەمیوانداری بەڕێوەبەری کۆمەڵگای مەرزی نێودەوڵەتی باشماخ و بەڕێوەبەری گشتیی فڕۆکەخانەی سلێمانی کۆبوونەوەیەک ئەنجام دەدەن.

کۆبوونەوەکە کاتژمێر ١١ی پێشنیوەرۆ لە بینای ئەنجوومەنی پارێزگای سلێمانی دەستی پێ کرد.

لە کۆبوونەوەکەدا راوێژ و پرسیار لە میوانەکان دەکرێت سەبارەت بە دەسەڵاتەکانی ئێستا و پێشووتری ئەو بەڕێوبەرایەتیانە و پێشنیازەکانیان بۆ باشترکردن و پێدانی دەسەڵاتی زیاتر.

ئەمە پێنجەمین کۆبوونەوەی ئەنجوومەنی پارێزگایە کە لەبارەی لامەرکەزیەتی ئیداری و دارایی-ەوە ئەنجام دەدرێت و پێشتر لەگەڵ پارێزگارەکانی سلێمانی، هەڵەبجە و بەڕێوەبەری ئیدارەکانی گەرمیان و راپەڕین و بەڕێوبەرە گشتییەکاندا کۆبوونەوەیان ئەنجامدا بوو.