كۆنگرەی رۆژنامەوانی پەرلەمانتاری گۆڕان سروە عەبدولواحید

سلێمانی - AA
ئەندامی پەرلەمانی عێراق لە فراكسیۆنی گۆڕان، سروە عەبدولواحید ئەمڕۆ دوای گەڕانەوەی لە رێگەی فرۆكەخانەی سلێمانییەوە كە ژماریەك لە پەرلەمانتارانی هاوكاری و بەرپرسانی تری گۆڕان ئامادەی پێشوازی بوون، لە لێدوانێكی رۆژنامەوانیدا گوتی: "سوپاسی هەموو ئەو كەسانە دەكەم كە پشتگیریان كردم بە تایبەتی هێزەكانی پێشمەرگە و كەسوكاری شەهیدان كە پشتیوانی و هاوسۆی خۆیان بۆ دەبڕیم بەرامبەر ئەو هێرشە ناڕەوایەی كرایە سەرم كە لە یەكێك لە چاوپێكەوتنەكانم وشەیەكیان گۆڕی بوو بۆ مەرامی سیاسی خۆیان".
لە ماوەی هەفتەی رابردوودا چاوپێكەوتنێكی سروە عەبدولواحید بۆ كەناڵێكی عێراقی و باسكردن لە رەوشی خێزان و كەسوكاری شەهیدانی پێشمەرگە، نیگەرانی و كاردانەوەی حكوومەت و لایەنەكان و كەسوكاری شەهیدان و هێزەكانی پێشمەرگەی لێكەوتەوە و چەندین خۆپیشاندان بەو بۆنەیەوە ئەنجامدران.
سروە عەبدولواحید گوتی: "ئەوان ئەو وشەیان گۆڕی كە ناهەقییەكی گەورە بوو بەرامبەر بە شەهیدان و كەسوكاری پێشمەرگە و خەڵكی هەرێمی كوردستان كە ناوی پێشمەرگە و كەسوكاری شەهیدان بۆ مەرامی سیاسی و موزایەدەی سیاسی بەكاربێت".

پەرلەمانتارەكەی گۆڕان لە پەرلەمانی عێراق رەخنەی لە پارتی دیموكراتی كوردستان لە پەرلەمانی عێراق گرت و ئەو لایەنەی بە شێواندنی چاوپێكەوتنەكەی تۆمەتبار كرد و ئاماژەی كرد بەوەی بەردەوام دەبێت لە لێدوان و چاوپێكەوتنەكانی و گوتی: "هەزار جاری تریش دژایەتیم بكەم لە گوتنی راستییەكان بێدەنگ نابم".