سلێمانی .. پڕۆسەی دەنگدانی تایبەت دەستی پێکرد

سلێمانی ـ AA

لە کاتژمێر ٠٨:٠٠ ی بەیانی و لە وادەی دیاری کراوی خۆیدا دەرگای بنکەکانی دەنگدان لە سنووری پارێزگای سلێمانی کرانەوە و ھێزە ئەمنییەکان کە دەنگدانی تایبەت دەیانگرێتەوە لەپێش دەرگای بنکەکان ئامادەن و نۆرەیان گرتووە بۆ چوونە ژوورەوە و بەشداریکردن دەنگدان.

لەو دوو بنکەیەی کە بۆ روماڵی ھەواڵی دەزگاکانی راگەیاندن تەرخانکراوە ( قوتابخانەی سەرکەوتنی بنەڕەتی و قوتابخانەی بەردەقارەمانی بنەڕەتی ) ژمارەیەکی زۆری ھێزی ئەمنی ئامادەییان ھەیە و چاوەڕێی دەنگدان دەکەن.

پڕۆسەی دەنگدان لە کاتژمێر 8ی بەیانی تاوەکو 6ی ئێوارە بەردەوام دەبێت، ژمارەی دەنگدەرانی تایبەت لە ھەرێمی کوردستان بریتییە لە ١٧٠ ھەزار و ٤٦٩ دەنگدەر ن لەو ژمارەیەش ٦٢ ھەزار و ٢٢٠ کەسیان لە پارێزگای سلێمانین.

کۆی گشتیی بنکەکانی دەنگدان کە بۆ دەنگدانی تایبەت تەرخان کراون، ٩٢ بنکەی دەنگدانە کە ٤٧١ وێستگە لەخۆ دەگرن، لەو ژمارەیەش ٤١ بنکە لە ھەولێر و ٣٧ بنکە لە سلێمانی و ٢٠ بنکەش لە دھۆک و یەک بنکەش لە ھەڵەبجەیە.

بۆ ھەڵبژاردنی گشتی پەرلەمانی کوردستان کە بڕیارە رۆژی یەکشەممە ٢٠١٨/٩/٣٠ بەڕێوەبچێت، دوو ملیۆن و ٩١٤ ھەزار و ٩٩٢ کەس مافی دەنگدانیان ھەیە، لەو ژمارەیەش یەک ملیۆن و ١٣٤ ھەزار و ٧٦٠ کەسیان دەکەونە پارێزگای سلێمانی.

ھەروەھا کۆی گشتیی بنکەکانی دەنگدانی گشتی لە ھەرێمی کوردستان بریتییە لە ٥ ھەزار و ٩٤١ بنکەی دەنگدان ، ٤٩٩ بنکە لە پارێزگای ھەولێر، ٤٧٦ بنکە بۆ پاریزگای سلێمانی، ٢٥٧ بنکەی دەنگدان بۆ پارێزگای دھۆک و ٢٨ بنکەی دەنگدانیش بۆ پارێزگای ھەڵەبجە.