"ئەمریکا خۆراک و سووتەمەنی بۆ ٢٥ ھەزار پێشمەرگە دابین دەکات"

سلێمانى - AA

ئەمینداری گشتی وەزارەتی پێشمەرگە جەبار یاوەر کە بەشداربوویەکی دیدارى سلێمانى بوو به‌ رۆژنامه‌نووسانى رایگەیاند: "لەلایەن ئەمریکاوە بڕی ٤٥٠ملیۆن دۆلار بۆ وەزارەتی پێشمەرگە تەرخانکراوە، کە تەنھا بۆ مووچە خەرج دەکرێت و مانگانە بۆ ٣٦ ھەزار پێشمەرگە تەرخان دەکرێت، سەرباری ئەوەش، ئەمریکا خۆراک و سووتەمەنی بۆ ٢٥ ھەزار پێشمەرگە دابین دەکات".

گوتیشی: "لەگەڵ سەرۆکایەتی ئەنجوومەنی وەزیران کۆبووینەتەوەو ئاماری قەرزەکانی وەزارەتمان داوەتە حکوومەت، ھەوڵەکان بەردەوامە بۆ ئەوەی قەرزی ئەو کۆمپانیایانە بدرێتەوە، چونکە گرێبەستیان لەگەڵ وەزارەت کردووە بۆ دابینکردنی جلوبەرگ و خۆراک و تەقەمەنی".

جەبار یاوەر ئاشکرای نەکرد کە وەزارەتەکەی چەند و بە چ کۆمپانیایەک قەرزدارە.