"یەکێتی بە میکانیزمێکی گونجاو کار بۆ کاراکردنەوەی پەرلەمان دەکات"

سلێمانی - AA
ئەندامی دەستەی کارگێڕی مەکتەبی سیاسی یەکێتی نیشتمانی کوردستان، حاکم قادر حەمەجان لە هەڤپەیڤینیکدا لەگەڵ ئاژانسی ئانادۆڵو باس لە دوایین هەڵویستی حزبەکەی لەبارەی پرسی ریفراندۆم و کاراکردنەوەی پەرلەمانی کوردستان دەکات.
لەبارەی پرسی ئەنجامدانی ریفراندۆم حاکم قادر گوتی: "پرسی گرنگ ئەمڕۆ بابەتی ریفراندۆمە بەرەو سەربەخۆیی، دیارە سەربەخۆیی مافی ھەموو خەڵکی کوردستانە و گەلی کوردستان لە عێراقدا بە زۆر لکێندراوە بەم وڵاتەوە دوور لە ویست و ئیرادەی خۆی، ئێستاش خەڵک و گەلی کوردستان بە ھەموو پێکھاتەکانییەوە مافێکی رەوا و یاسایی و ئینسانییە بڕیار لە چارەنووسی خۆی بدات".
حاکم قادر گوتیشی: "وەک یەکێتی نیشتمانی کوردستان کە دروشمی ئێمە لە ساڵانی ھەشتاکانەوە بۆ ئێستا مافی چارەنووس بووە، ئەو مافەش چ لە رووی سیاسی و چ لە رووی یاساییشەوە لە دوا شیکردنەوەیدا مانای سەربەخۆیی دەگەیەنێت، سەربەخۆیش مافی گەلی کوردە و پەیوەندی بە حزبێک یان چەند حزبێکەوە نییە و ناکرێت ئەوە بکرێت بە باتێکی حزبی سڕف، بەڵکو پەیوەندی بە ھەموو نوێنەرانی گەلەوە ھەیە لە پەرلەمان، بە حزبە سیاسییەکانەوە، بە خەڵکی کوردستان و ھەموو پێکھاتەکانی تریش لە ھەرێمی کوردستان".

بەرپرسەکەی یەکێتی بۆچوونی حزبەکەی لەبارەی ریفراندۆم ئاشکرا کرد و گوتی: "لەسەر ئەو پرسە بۆچوونی جیاجیا ھەیە و ھەموو لایەنە سیاسییەکان و خەڵکی کوردستان بە گشتی پشتیوانی ریفراندۆم بۆ سەربەخۆیی دەکات، ئێمە وەک یەکێتی مەبەستمانە کە ریفراندۆم بکرێت بۆ سەربەخۆیی نەوەک وەک کارتێکی گووشار بەکاربێت".

حاکم قادر جەختی کردەوە لەوەی ھەموو لایەنە سیاییەکان پشتگیری ریفراندۆم دەکەن بۆ سەربەخۆیی، لەھەمانکاتدا بۆچوونی جیاوازیش هەیە لەسەر ئەو پرسە و لەوبارەیەوە گوتی: "دیدی جیاواز و بۆچوونی جیامان ھەیە، ھەندێک لە لایەنە سیاسییەکان پێیان وایە کە حکوومەت دەتوانێت ئەو بڕیارە بدات، ھەندێک لایەنیش پێیان وایە کۆمیسیۆن دەتوانێت ئەو بڕیارە بدات، ئێمە وەک یەکێتی بۆ ھەموو پرسە نیشتمانیی و نەتەوەییەکان بە گرنگی دەزانین پەرلەمان کارا بکرێتەوە بە میکانیزمێک کە بەرژەوەندی گەلەکەمانی تێدا بێت".
لەبارەی ھەوڵی حزبەکەی بۆ کاراکردنەوەی پەرلەمان، ئەندامی دەستەی کارگێڕی مەکتەبی سیاسی یەکێتی نیشتمانی کوردستان، حاکم قادر حەمەجان گوتی: "وەک یەکێتی نیشتمانی کوردستان لەگەڵ ئەوەین پەرلەمان کارا بکرێتەوە وەک دەزگایەکی شەرعی و دەزگایەکی یاسایی و دەزگایەکی نوێنەری خەڵک و کاراکردنەوەی بە گرنگ دەزانین، بۆیە ئێستا لە ھەوڵی ئەوەداین وەک یەکێتی کە لە نەخشە رێگاکەشمان ھاتووە کە ئەوە نەخشە و بەرنامەی یەکێتییە بۆ ئەم قۆناغە بۆ چارەسەرکردنی ھەموو پرسەکان لە پرسی نیشتمانی و نەتەوەیی و پەیوەندییەکانمان لە ناوخۆ و چارەسەرکردنی قەیرانەکان لە ھەرێمی کوردستان لە قەیرانی سیاسی و دارایی، ھەروەھا ناکۆکی و ململانێکان لە نێوان ھەرێم و بەغدا ، باشترین رێگا ئەوەیە بە دانیشتن و گفتوگۆ لە نێوان حزبە سیاسییەکاندا کێشەکانمان چارەسەر بکەین. بۆیە پێشنیاری ئەوەمان کردووە و کاری بۆ دەکەین تاوەکو بتوانین بە میکانیزمێکی گونجاو ھەوڵ بدەین پەرلەمان کارا بکەینەوە، ھەم بۆ پرسی ریفراندۆم و سەربەخۆیی، ھەم بۆ سەرجەم پرسە نیشتمانی و نەتەوەییەکان".