گەشتکردن لە ئەڵمانیاوە بۆ تورکیا بەڕێژەی سەدا ٢٠ زیادیکردووە

بەرلین - AA

ژمارەی ئەو گەشتیارانەی لە فڕۆکەخانەکانی ئەڵمانیاوە لەنیوەی یەکەمی ئەمساڵدا روویان لە تورکیا کردووە، لەچاو ساڵی رابردوودا بەڕێژەی سەدا ٢٠ زیادیکردووە و گەیشتووەتە سێ ملیۆن کەس.

بەپێی ئەو راگەیەندراوەی لە نووسینگەی ئاماری فیدڕاڵی ئەڵمانیا بڵاوکراوەتەوە، لە نیوەی یەکەمی ئەمساڵ ژمارەی گەشتیاران لە فڕۆکەخانەکانی ئەڵمانیا لە چاو ساڵی رابردوو سەدا ٢،٥ زیادیکردووە و گەیشتووەتە ٥٦ ملیۆن و ٥٠٠ ھەزار کەس. لە کاتێکدا لە نیوەی یەکەمی ساڵی رابردوو ٥٥ ملیۆن و ١٦٧ هەزار کەس لە ئەڵمانیاوە بەرەو وڵاتانی دیکە گەشتیان کردووە.

بەم پێیەش ژمارەی ئەو گەشتیارانەی لە فڕۆکەخانەکانی ئەڵمانیاوە لەنیوەی یەکەمی ئەمساڵدا روویان لە تورکیا کردووە، لەچاو ساڵی رابردوودا بەرێژەی سەدا ٢٠ زیادیکردووە و گەیشتووەتە سێ ملیۆن کەس.

ھاوکات ژمارەی ئەو گەشتیارانەی کە لە ئەڵمانیاوە لەنیوەی یەکەمی ئەمساڵدا روویان لە ئەفریقا کردووە بە رێژەی سەدا ٣١،١ زیادیکردووەتەوە و گەیشتووەتە یەک ملیۆن و ٣٢٠ ھەزار کەس. لە پاڵ ئەمەش زۆرترین ژمارەی ئەو گەشتیارانەی لە فڕۆکەخانەکانی ئەڵمانیاوە چوونەتە دەرەوەی ئەورووپا، سەردانی وڵاتی میسریان کردووە و ئەم رێژەیەش لە چاو ساڵی رابردوو سەدا ٥٥،٥ زیادیکردووە و گەیشتووەتە ٨٨٩ ھەزار گەشتیار.

ھەر بەپێی ئامارەکان لە ناوخۆی ئەورووپا زۆرترین ژمارەی ئەو گەشتیارانەی لە رێگەی فڕۆکەخانەکانی ئەڵمانیا گەشتیان کردووە، روویان لە وڵاتی ئیسپانیا کردووە، بە جۆرێک کە شەش ملیۆن و ٥٧٢ ھەزار گەشتیار سەردانی ئەو وڵاتەیان کردووە.

ھەر لە نیوەی یەکەمی ئەمساڵدا گەشتکردن بۆ ئەمریکا و کۆماری دۆمینیک زۆرترین دابەزینی بەخۆیەوە بینیوە.