Dilşad Seyfeddin Ahmet
31 تەمووز 2016•نوێکردنەوە: 01 ئاب 2016
ئەوان كە زۆربەیان لەو پیاوە بەتەمانە بوون كە لەماوەی ساڵانی رابردوودا پێشمەرگەی یەكێتی نیشتمانی كوردستان بوون و وەك پێشمەرگەی دێرین خانەنشین كراون، لەسەرەتای دەستپێكردنی دەوامەوە چوونە بەردەم بارەگای مەكتەبی سیاسی یەكێتی نیشتمانی كوردستان لە شاری سلێمانی و دەرگای سەرەكی ئەو بارەگایەیان داخست.
ئەوان پەیامێكیان هەبوو بۆ بەرپرسانی حزبەكەیان كە خۆی لەچەند خاڵێكدا دەبینییەوەو داوای وەڵامیان دەكرد، هۆشیاری ئەوەشیاندا كە هەموو رۆژانێكی یەكشەممان لە خۆپیشاندان و گردبوونەوە بەردەوام دەبن تا ئەو كاتەی وەڵامیان دەدرێتەوە.
محەمەد عەلی پێشمەرگەیەكی خانەنشینی یەكێتییە و لەساڵی 1981 پێشمەرگەی ئەو حزبە بووە لە شاخ، ئەو لەبارەی داواكارییەكانیانەوە بە ئاژانسی ئانادۆڵوی راگەیاند: "وەك پێشمەرگە دێرینەكان و كەسوكاری شەهیدانی یەكێتی داوا دەكەین مووچەی شەهیدان و پێشمەرگە دێرینەكان هەموو مانگێك دابەش بكرێت و سیستمی كەمكردنەوەی مووچە نەیانگرێتەوە، هەروەها مووچەی پێشمەرگە دێرینەكان بگوازرێتەوە بۆ سەر وەزارەتی پێشمەرگە و هێزەكانی 70، ئەنجامدانی چاكسازی لە لیستی خانەنشینی پێشمەرگە دێرینەكان، قەرەبووی مووچەی هەشت مانگی رابردوو كە تائێستا وەرمان نەگرتووە".
ئەو ئاماژەی بەوەش كرد، بڕیاریانداوە هەموو رۆژێكی یەكشەممان بەردەوام بن لە گربوونەوەو خۆپیشاندان لەهەمان شوێندا تا ئەو كاتەی وەڵامی داواكانیان دەدرێتەوە.
ژمارەیەك لە بەشداربووانی تری گردبوونەوەكە بە نیگەرانییەوە باسیان لەوە كرد ئەوان وەك مافێكی رەوای خۆیان كۆبوونەتەوەو داوا لە حزبەكەیان دەكەین مافە رەواكانی خۆیان بۆ بگێڕێتەوەو چیتر ستەم لە كەسوكاری شەهیدان و پێشمەرگە دێرینەكان نەكەن كە چەندین مانگە مووچەیان وەرنەگرتووەو بەو هۆیەوە لە دۆخێكی خراپدان.
گردبوونەوەو ناڕەزایی ئەو كەسانە لە كاتێكدایە بەهۆی قەیرانی داراییەوە كە لەسەرەتای ساڵی 2014 ەوە هەرێمی كوردستانی گرتووەتەوە، قەیرانێكی دارایی سەخت رووی لە هەرێم كردووە و بەو هۆیەوە مووچەی مانگانەی مووچەخۆران لەكاتی خۆیدا دابەش ناكرێت، تائێستاش مووچەی چوار مانگی رابردووی ساڵی پار دابەش نەكراوە.
دوای بڕیاری حكوومەتی هەرێمی كوردستان و دانانی سیستمێكی نوێی پاشەكەوتكردنی مووچەی فەرمانبەران، كەلەسەرەتای ئەمساڵەوە جێبەجێكرا و مووچە بۆ زیاتر لە نیوە كەمكراوەتەوە، لە پێناو دابینكردنی بڕی پارەی مووچەی فەرمانبەران و دابەشكردنی لەكاتی خۆیدا، بەڵام تائێستا مووچەی مانگی حوزەیرانی زۆربەی وەزارەت و چین و توێژەكانی تر دابەش نەكراوە و مووچەی خانەنشینانیش چەند مانگ جارێك دابەش دەكرێت.
