کۆماری باشووری ئەفریقا.. لە بینایەکی گڕگرتودا دایک و منداڵێک رزگاریان بوو

ئیستانبوڵ- AA

لە شاری دێربن باشووری رۆژهەڵاتی کۆماری باشووری ئەفریقا، دایک و منداڵێک کە لە بینایەکدا گیریان خواردبوو، رزگاریان بوو و وەک دەگوترێت بیناکە لەلایەن کۆمەڵێک چەتەوە ئاگری تێبەردراوە.

ئەو گرتانەی کە لە تۆڕە کۆمەڵایەتییەکاندا بڵاوکراونەتەوە، ئەوە نیشاندەدەن کە دایکەکە بۆ رزگارکردنی منداڵەکەی، خۆی هەڵداوەتە خوارەوە و بە هاوکاری ئەو خۆبەخشانەی لە نزیک شوێنی رووداوەکەبوون، تواندراوە منداڵەکە بەبێ هیچ زیانێک رزگار بکرێت.

ئەو گرتە ڤیدیۆیانەی کە لەناو بیناکەدا گیراون و لە تۆڕەکۆمەڵایەتییەکاندا بڵاوکراونەتەوە، دەنگدانەوەیەکی گەورەیان بەدوای خۆیاندا هێناوە.

لە نۆی تەمووزەوە خۆپیشاندان لە کۆماری باشووری ئەفریقا دەستی پێ کرد و خۆپیشاندەران داوایان دەکرد لێخۆشبوون بۆ سەرکۆماری پێشووی وڵاتەکەیان، جاکۆب زوما دەربکرێت کە بە ١٥ مانگ زیندانیکردن سزادراوە، ماوەیەکی کەمیش دوای دەست پێکردنی خۆپیشاندانەکان، توندوتیژی و پێکداهەڵپژان روویاندا.

تا ئێستاش بەهۆی رووداوەکانەوە، ٧٢ کەس کوژراون و سەدانی دیکەش برینداربوون.