سلێمانی.. پێشبڕكێی وێنەی خەونی هونەری ئۆتۆمبێلی تۆیۆتا

سلێمانی -AA

لە رێوڕەسمێكدا كە پاش نیوەڕۆی ئەمڕۆ لە شاری سلێمانی بە ئامادەبوونی بەرپرسانی كۆمپانیاكە و كەسوكاری بەشداربووەكان بەڕێوەچوو، رێوڕەسمی هەڵبژاردنی براوەی پێشبڕكێی وێنەیی خەونی هونەری ئۆتۆمبێلی تۆیۆتا 2017 لە عێراق سازكرا كە بۆ سێهەم جارە لە عێراق و پانزەهەمین جارە لە جیهاندا بەڕێوەدەچێت و تیایدا نۆ منداڵ هەڵبژێردران.

ساڵی رابردوو لە 81 وڵاتی جیهان 850 هەزار منداڵ بەشدارییان كرد و یەكەمەكانی پێشبڕكێیەكە خەڵات كران.

سەرپەرشتیاری پێشبڕكێیەكە، رۆژان فەتاح بە ئاژانسی ئانادۆڵوی راگەیاند "ئەم پێشبڕكێیە ساڵانە بۆ خوێندكارانی خوێندنگەكان ساز دەكرێت و بەشداربووان دابەشكراون بەسەر سێ‌ قۆناغدا، قۆناغە یەكەم بۆ خوار تەمەنی هەشت ساڵان، قۆناغی دووەم بۆ منداڵانی هەشت بۆ 11 ساڵان و قۆناغی سێیەمیش بۆ ئەوانەی تەمەنیان لە نێوان 11 بۆ 15 ساڵان دایە".

رۆژان فەتاح گوتی: "ئامانج لەم پێشبڕكێیە پەرەپێدانی تواناكانی منداڵان و یارمەتیدانیانە لە بواری هونەری و بەردەوام بوونیان بۆ هێنانەدی خەون و خەیاڵەكانی خۆیان لە بواری هونەری وێنەكێشانی ئۆتۆمبێل، تێیدا ئەو منداڵانە بەشدارن كە وێنەی خەونی ئۆتۆمبێلەكانیان دەكێشن".

لەم پێشبرشكێیەدا هەزار و 600 منداڵ لەسەر ئاستی عێراق بەشدارییان كردووە ، ئەمڕۆش نۆ منداڵیان لەلایەن لیژنەی داوەرانەوە هەڵبژێردران و بڕوانامە و خەڵاتی رێزلێنانیان پێبەخشرا و بەشداری لە پێشبڕكێی جیهانیی كۆمپانیاكە دەكەن كە لە وڵاتی یابان بەڕێوەدەچێت.