ژمارەی ئاوارەکان لە دیبەگە ٣١ ھەزار کەسی تێپەراند

مەخموور -AA
ھاتنی بەلێشاوی ئاوارە لە سنووری ناوچەکانی ژێر دەسەڵاتی داعش بۆ شارەدێی دیبەگە بەردەوامە و لە ئێستادا ژمارەی ئاوارەکان لەو سنوورە ٣١ ھەزار کەس ئاوارەی تێپەراندووە و بەبەردەوامی و رۆژانەش سەدان کەس ئاوارەی ئەم سنوورە دەبن.
ژمارەی ئاوارەکان لەو سنوورە لە دانیشتووانی شارەدێی دیبەگە و ناوەندی شارۆچکە مەخموور زیاترە بەڵام باوەشیان بۆ زیاتر لە سی و یەک ھەزار ئاوارە کردووەتەوە و چاوەڕێی دەکرێت لەگەڵ دەستپێکردنی ئوپەراسیۆنی کۆنترۆڵکردنەوەی شاری مووسڵ ئەو ژمارەیە زیاتر ببێت.
بەڕێوەبەری کەمپی دیبەگە رزگار عوبێد لە لێدوانێکدا بۆ ئاژانسی ئانادۆڵو گوتی: "لە ئێستادا پێنج کەمپ لە شارەدێی دیبەگە درووستکراوە و تا ئێستا پێنج ھەزار و ٤٠٠ خێزان کە ژمارەیان دەگاتە زیاتر لە ٣١ ھەزار کەس تێیدا نیشتەجێ کراون. و ھەوەھا لە کۆی گشتی ئەو خێزانانە تەنیا ١٧٧خێزان لە نێو قوتابخانەکانی ئەو سنوورە ماون ئەوانیش شوێنیان بۆ دابینکراوە و لەو ماوەیەدا دێنە نێو خێوەتەکانیان".
ناوبراو گوتیشی: "ژمارەی ئاوارەکانی کەمپەکانی دیبەگە لە ژمارەی دانیشتووانی دیبەگە و ناوەندی شارۆچکەی مەخموور زیاترە و ئەوەش بە ناچاری ھەرێمی کوردستان دەرگاکانی بە رووی ئاوارەکاندا کردووتەوە".
رزگار عوبێد ئاوارەکانی بە میوانی کاتی ناو برد و گوتی: "لە رۆژێکی ئاساییدا ئەگەر ئوپەراسیۆن نەبێت، نزیکەی ٥٠ بۆ ٧٠ خێزان رووی لە سنووری ھەرێمی کوردستان دەکەن و ئەو ئاوارانەش ئەو کەسانەن کە لە دەست داعش رادەکەن و لە رۆژانی ئوپەراسیۆندا زیاتر لە هەزار خێزان ھەڵ دێن ئەوەش نیشانەی ئەوەیە کە ئەوان ھەرێمی کوردستان بە پەناگەی خۆیان دەبینن".
لە بارەی ئامادەکاری بۆ ھاتنی ئاوارەکانی مووسڵ لە کاتی دەستپێکردنی ئۆپەراسیۆنی کۆنترۆڵکردنەوەی شارەکە ئەو بەرێوەبەرە دەلێت: " بە پێی زانیارییەکانی ئێمە و نەتەوەیەکگرتووەەکان ئەگەری ھەیە زیاتر لە یەک ملیۆن کەس ئاوارە ببێت و ئەوەش ژمارەیەکی زۆرە و ئێمەش لە ھەوڵی ئەوەداین کە خزمەتگوزاری زیاتر بکەین. بە جۆرێک لە رۆژانی یەکەمی ئوپەراسیۆن ئێمە خواردنی گەرم بۆ دوو ملیۆن تا دووملیۆن و ٥٠٠ کەس ئامادە دەکەین و ھەروەھا لە ھەوڵداین خێوەتی زیاتر دروست بکەین تا دووچاری کێشەی نەبین بە تایبەتی کە ئێستا وەرزی زستان نزیکە".
لە بارەی رەوشی ئەمنی کە کاریگەری لە سەر ناوچەکە دەبیت بەڕێوەبەری کەمپی دیبەگە رزگار عوبێد گوتی: "مەترسی دەبێت لە ناوچەکە بەڵام ھێزەکانی ئەمنی رۆژانە کۆنترۆلی ئەو رەوشە دەکەن و ناهێڵن بۆشایی ئەمنی دروست ببێت".