نێچیرڤان بارزانی له‌گه‌ڵ شاندێكی به‌ریتانی کۆبوویەوە

هەولێر - AA

سه‌رۆكوه‌زیرانی هه‌رێمی كوردستان، نێچیرڤان بارزانی پێشوازی له‌ وه‌زیری ده‌وڵه‌تی به‌ریتانیا بۆ كاروباری ڕۆژهه‌ڵاتی ناوه‌ڕاست و باكووری ئافریقا، تۆبیاس ئێلوود و شاندێكی دیپلۆماسیی یاوه‌ری كرد.

ماڵپەڕی فەرمی حکوومەتی هەرێمی کوردستان بڵاوی کردووەتەوە، له‌ دیدارێكدا كه‌ جێگری سه‌رۆكوه‌زیران، قوباد تاڵه‌بانی و ژماره‌یه‌ك له‌ وه‌زیر و به‌رپرسانی حكوومه‌تی هه‌رێمی كوردستان ئاماده‌ی بوون، شاندی میوان خۆشحاڵیی خۆیان به‌ سه‌ردانی هه‌رێمی كوردستان ده‌ربڕی و دۆستایه‌تی و پاڵپشتیی خه‌ڵك و حكوومه‌تی به‌ریتانیایان بۆ خه‌ڵك و حكوومه‌تی هه‌رێمی كوردستان دووپات كرده‌وه‌، هه‌روه‌ها ڕووبه‌ڕووبوونه‌وه‌ی تیرۆر له‌لایه‌ن پێشمه‌رگه‌ و خه‌ڵكی هه‌رێمی كوردستانه‌وه‌‌ و پاراستنی ئاواره‌ و په‌نابه‌ران به‌ هه‌موو پێكهاته‌كانیانه‌وه‌ و هه‌ماهه‌نگیی نیوان وه‌زاره‌تی پێشمه‌رگه‌ و سوپای عێراقیان به‌رز نرخاند.

سه‌باره‌ت به‌ بارودۆخی مووسڵ دوای داعش، شاندی میوان به‌ پێویستی زانی هه‌ماهه‌نگییه‌كی ته‌واو له‌ نێوان هه‌موو پێكهاته‌كانی شاره‌كه‌ و هه‌رێمی كوردستان و حكوومه‌تی فیدرال و كۆمه‌ڵگه‌ی نێوده‌وڵه‌تیدا هه‌بێت به‌مه‌به‌ستی پاراستنی ئارامیی ناوچه‌كه‌ و ئاوه‌دانكردنه‌وه‌ی و پاڵپشتی خۆیان بۆ چاره‌سه‌ركردنی كێشه‌ سیاسییه‌كان له‌ هه‌رێمی كوردستان له‌لایه‌ك، كێشه‌ هه‌ڵواسراوه‌كانی نێوان هه‌ولێر و به‌غدا له‌لایه‌كی دیكه‌ به‌ ڕێگه‌ی دیالۆگ و گفتوگۆ ده‌ربڕی.

سه‌رۆكوه‌زیرانی هه‌رێمی كوردستان سوپاسی سه‌ردانی شاندی میوان و پاڵپشتی و هاوكارییه‌كانی حكوومه‌تی به‌ریتانیا له‌ بواره‌كانی مرۆیی و سه‌ربازیدا بۆ هه‌رێمی كوردستان كرد و به‌ پێویستی زانی هه‌ماهه‌نگییه‌كی نێوده‌وڵه‌تی هه‌بێت بۆ پرۆسه‌ی سیاسی و ئاوه‌دانكردنه‌وه‌ و به‌ره‌وپێشه‌وه‌بردنی ڕه‌وشی ئابووریی و گه‌ڕاندنه‌وه‌ی متمانه‌ بۆ پێكهاته‌كانی شاری مووسڵ دوای داعش كه‌ تا ئێستا گرنگی پێنه‌دراوه‌ و‌‌ ئه‌ركی سه‌ره‌كیش له‌مباره‌یه‌وه‌ ده‌كه‌وێته‌ سه‌ر شانی حكوومه‌تی عیراق و ئاماده‌ییی هه‌رێمی كوردستانیشی بۆ هه‌ر هاوكاری و هه‌ماهه‌نگییه‌ك له‌مڕووه‌وه‌‌ نیشان دا.

له‌ به‌شێكی دیكه‌ی قسه‌كانیدا نێچیرڤان بارزانی پوخته‌یه‌كی ده‌رباره‌ی قوربانییه‌كانی هێزی پێشمه‌رگه‌ له‌ دژی تیرۆر و حه‌واندنه‌وه‌ی ژماره‌یه‌كی ئێجگار زۆری ئاواره‌ و په‌نابه‌ران و به‌هاناوه‌نه‌هاتنی به‌غدا بۆ ئه‌م پرسه‌ وه‌ك پێویست، بۆ شاندی میوان خسته‌ ڕوو و دووپاتی كرده‌وه‌ جگه‌ له‌ هه‌ماهه‌نگیی سه‌ربازی، له‌ هیچ بوارێكی دیكه‌دا هاوكاری و هه‌ماهه‌نگی له‌ نێوان هه‌ولێر و به‌غدا نه‌بووه‌ و به‌ پێویستی زانی كۆمه‌ڵگه‌ی نێوده‌وڵه‌تی له‌مباره‌یه‌وه‌ هاوكار بێت.

سه‌باره‌ت به‌ داهاتووی هه‌رێمی كوردستانیش سەرۆکوەزیرانی هەرێمی کوردستان ئاماژه‌ی به‌وه‌ دا كه‌ دیالۆگێكی جددی له‌ نێوان لایه‌نه‌كانی كوردستاندا هه‌یه‌ بۆ چاره‌سه‌ركردنی كێشه‌ سیاسییه‌كان و گفتوگۆیه‌كی چڕیش له‌سه‌ر بابه‌تی ڕیفراندۆمی هه‌رێمی كوردستان بۆ ئه‌وه‌ی خه‌ڵكی هه‌رێمی كوردستان خۆیان داهاتووی خۆیان دیاری بكه‌ن، به‌ڕێوه ‌ده‌چێت. له‌مباره‌یه‌شه‌وه‌ به‌ پێویستی زانی دیالۆگی ڕاشكاوانه‌ له‌گه‌ڵ به‌غدا ده‌ستپێبكرێت، چونكه‌ هه‌رێمی كوردستان خوازیاره‌ سیستەمی سیاسی هه‌ر چۆنێك بێت، باشترین په‌یوه‌ندی له‌گه‌ڵ به‌غدا هه‌بێت.