مەسرور بارزانی پێشوازیی لە شاندێکی وەزارەتی دەرەوەی نەمسا کرد

هەولێر - AA

سەرۆکی حکوومەتی ھەرێمی کوردستان، مەسرور بارزانی پێشوازیی لە سەرۆکی بەشی رۆژھەڵاتی ناوەڕاست و باکووری ئەفریقا و باشووری ئەورووپا لە وەزارەتی دەرەوەی نەمسا، گیرۆڵد ڤۆڵمەر و باڵیۆزی نەمسا لە عێراق و ئوردن ئۆسکار ڤوستنگەر کرد.

نووسینگەی رۆژنامەوانیی سەرۆکی حکوومەتی ھەرێمی کورستان بڵاوی کردەوە کە لە دیدارەکەدا، گۆڕانکاریی و پەرەسەندنەکانی عێراق و ناوچەکە و پەرەپێدانی پەیوەندییەکانی نەمسا لەگەڵ عێراق و ھەرێمی کوردستان تاوتوێ کراوە.

راشیگەیاندووە کە سەرۆکی حکوومەتی هەرێمی کوردستان بە پێزانینەوە ئاماژەی بە پەیوەندی دۆستانە و مێژوویی وڵاتی نەمسا لەگەڵ ھەرێمی کوردستان و پشتگیریکردنی ئەو وڵاتە لە خەڵکی کوردستان کردووە.

ئاماژەی بەوەیشداوە، شاندی نەمسا خواستی وڵاتەکەیان بۆ برەودانی زیاتر بە پەیوەندییەکان لەگەڵ ھەرێمی کوردستان بەتایبەتی لە بواری بازرگانی و وەبەرھێناندا دەربڕیووە.

نووسینگەی رۆژنامەوانیی سەرۆکی حکوومەتی ھەرێمی کورستان ئەوەیشی خستووەتە روو، چارەسەرکردنی کێشەی کۆچبەرانی کورد لە ئەورووپا و گرنگیی رێگرتن لە کۆچی نایاسایی، تەوەرێکی گفتوگۆکانی دیدارەکە بووە.