سکرتێری گشتی ناتۆ سەردانی تورکیا و یۆنان دەکات

برۆکسڵ - AA

سکرتێری گشتی ناتۆ، یانس ستۆڵتنبێرگ ھەفتەی داھاتوو سەردانی تورکیا و یۆنان دەکات.

بەگوێرەی ئەو راگەیەنراوەی کە لە ناتۆ بڵاوکراوەتەوە، ستۆڵتنبێرگ رۆژی دووشەممەی داهاتوو سەردانی ئەنقەرە پایتەختی تورکیا و رۆژی سێشەمەش سەردانی ئەسینا پایتەختی یۆنان دەکات.

ستۆڵتنبێرگ لە چوارچێوەی دیدار و کۆبوونەوەکانیدا لە ئەنقەرە، لەگەڵ ھەریەک لە وەزیری دەرەوەی تورکیا، مەولود چاوشئۆغڵو و بەرپرسانی باڵای تورکیا کۆدەبێتەوە.

دواتریش ستۆڵتنبێرگ سەردانی ئەسینا دەکات و لەگەڵ بەرپرسانی باڵای یۆنان کۆدەبێتەوە.

دوێنێ پێنجشەممە، ناتۆ ئاشکرایکردبوو دوای ماوەیەک لە بەردەوامیی کۆبوونەوەکان لەسەر پرسی خۆرھەڵاتی دەریای ناوەڕاست، میکانیزمێک سەبارەت بە شێوازەکانی دابەشکردن، لەنێوان تورکیا و یۆناندا پێکھێنراوە.