ئیدلب ــ AA

ئۆپۆزسیۆنی سووریا رایگەیاند کە لە ئاکامی زنجیرەیەک ھێرشی فڕۆکە جەنگییەکانی رووسیا بۆسەر کەمپێکی ئاوارەکان لە ناوچەی سەراقب باشووری رۆژھەڵاتی پارێزگای ئیدلب، دوو مەدەنی کوژران و ١٩ی دیکەش برینداربوون.

ناوچەی سەراقب دەکەوێتە چوارچێوەی رێککەوتنی کەمکردنەوەی گرژییەکان لە ئیدلب.

سەرچاوەکان لە بەرگری شارستانی کە بە (کڵاو سپییەکان) ناسراوە ئاشکرایانکرد، بەرەبەیانی ئەمڕۆ چوارشەممە لە زنجیرەیەک ھێرشدا، کەمپێکی ئاوارەکان لە دەورووبەری گوندی "کەفر عەمیم" سەربە ناوچەی سەراقب باشووری رۆژھەڵاتی ئیدلب کرایە ئامانج.

ئەو سەرچاوانە ئاماژەیان بەوەشدا کە لە ئاکامی ھێرشەکاندا، دوو مەدەنی کوژراون و ١٩ی دیکەش کە زۆربەیان منداڵن، برینداربوون .

ھاوکات سەرچاوەیەک لە ئۆپۆزسیۆنی سووریا رایگەیاندووە کە فڕۆکەیەکی جەنگی رووسیا لە جۆری " سو ـ ٣٤" درەنگانی شەوی رابردوو دوای فڕینی لە بنکەی حمێمیم لە پارێزگای لازقییە، زنجیرەیەک ھێرشی بۆسەر کەمپەکە ئەنجامداوە کە تا کاتژمێر چواری بەرەبەیانی ئەمڕۆ چوارشەممە بەردەوامبوو.

شەوی رابردووش، ھێزەکانی رژێم و گرووپە تیرۆریستییەکان کە ئێران پشتگیریان دەکات کە لە گوندی ئەبو دالی لە پارێزگای حەما جێگیرکراون، بە فسفۆری سپی ھێرشیان کردبووە سەر ناحیەی تەمانعە لە باشووری ئیدلب.