حەیدەر عەبادی: "سەركەوتنی گەورە بەڕێوەیە"

سلێمانی ــ AA

سەرۆكوەزیرانی عێراق، حەیدەر عەبادی لە پێنجەمین دیداری سلێمانی كە زانكۆی ئەمریكی لە سلێمانی سازی كردووە گوتەیەكی پێشكەش كرد و تیایدا تیشكی خستە سەر چەند تەوەرێک لەوانە شەڕی دژبە داعش و رۆژی جیهانی ئافرەتان و رۆڵی زانكۆكان.

سەرەتا حەیدەر عەبادی گوتی: " داعش بەبڕی ٣٥ ملیار دۆلاری زیانی بەژێرخانی ئابووری عێراق گەیاندووە و هەموو پێكهاتەكانی عێراقیش بەبێ‌ جیاوازی لە موسڵ بەشداری دەکەن لە جەنگی دژی داعش"

سەرۆكوەزیرانی عێراق گوتیشی: "لە پێناو رزگاركردنی گیانی هاووڵاتییانی مەدەنی، ئێمە هەموو رۆژێك لە مووسڵ قوربانیمان هەیە و شەڕی داعش تەنها شەڕی عێراق نییە بەڵكو شەڕی هەموو جیهانە".

حەیدەر عەبادی گوتیشی: "رێكخراوی داعش دەوێەوێت شارستانی عێراق بگۆڕێت و وێرانی بكات. ئەو رێكخراوە هەر لەسەرەتاوە هەوڵی دروستكردنی ناكۆكی داوە لەنێو پێكهاتەكانی عێراق".

سەرۆكوەزیرانی عێراق گوتیشی: "ئەگەر داعش سەربكەوتایە، ئەوە هیچ جۆرە ئازادییەكمان نەدەما، ئێمە لە گۆڕەپانی شەڕ بەسەر داعشدا سەركەوتووین بەڵام پێویستە یەكێتی ناوخۆییمان بپارێزین".

حەیدەر عەبادی باسی لەوەشكرد كە هێزەكانی عێراق پێش كۆنتڕۆڵكردنەوەی خاك و ناوچەكان، ئامانجیان رزگاركردنی گیانی مرۆڤە لە بیری توندڕەوی داعش.

سەرۆكوەزیرانی عێراق ئاماژەی بەوەشدا كە دوای شەڕی دژبە داعش، شەڕ بۆ پێكەوە ژیان و ئاشتی دەكەن و گوتیشی: "پێویستە هێز، هێزی عێراقییەكان بێت و نابێت سەربە مەزهەب یان هێزێكی سیاسی بێت".

هەر لەدرێژەی گوتەكەیدا حەیدەر عەبادی باسی لە مەترسی بوونی گەندەڵی كرد و گوتی: "مەترسی گەندەڵی هیچی لەمەترسی تیرۆر كەمتر نییە بگڕە بوونی گەندەڵی دەبێتە هۆی دروستبوونی تیرۆر و ئێمە بەهەموو توانایەكمانەوە رووبەڕووی دەبینەوە".

لەبارەی ناوچە كێشە لەسەرەكانیش، سەرۆكوەزیرانی عێراق گوتی: "ناوچە كێشە لەسەرەكان دەكەینە ناوچە رێككەوتوو لەسەر و ئێمە نامەنەوێت بگەڕێنەوە سەردەمی دیكتاتۆرییەت".

حەیدەر عەبادی لەبارەی هێزەكانی پێشمەرگە و عێراقەوە گوتی: "هێزەكانی عێراق هاوشانی هێزەكانی پێشمەرگە دژی داعش دەجەنگن".

سەرۆكوەزیرانی عێراق ئەوەی وەبیر هێنایەوە كە زۆر كەس گرەویان لەسەر شكستخواردنی عێراق كرد بەڵام ئەوان دۆڕان و عێراق سەركەوت.

حەیدەر عەبادی گوتیشی: "پێویستە وەك تیرۆر رووبەڕووی تیرۆر ببینەوە و بۆ ئەوەی رێگری بكەین لە بڵاوبوونەوەی بیر و كاری توندڕەویی و دژی بوەستینەوە ".

سەرۆكوەزیرانی عێراق دووپاتی كردەوە كە ئەو پابەندە بەدەستوور و هێزی لە دژی هیچ لایەك بەكار ناهێنێت و گوتیشی: "پێویستە سوپایەك دروست بكەین كە پارێزگاری لە عێراق و عێراقییەكان بكات".

حەیدەر عەبادی ئەوەشی گوت:"بەهۆی شەڕی ناوخۆی سووریاوە، تیرۆر لە عێراق دروست بوو هەروەها رەزامەندی حكوومەتی سووریامان وەرگرتووە بۆ بۆردومانكردنی داعش لەناو خاكی ئەو وڵاتە".

لە بەشێكی دیكەی گوتەكەیدا حەیدەر عەبادی بەبۆنەی ڕۆژی ٨ ی مارسیشەوە پیرۆزبایی لە ئافرەتان كرد و داوایكرد، ڕێژەی ئافرەتان لە دامەزراوەكاندا زیاد بكرێت و تەنانەت پۆستی سەرۆكی حزبەكان و پۆستە باڵاكانیش وەربگرن.

لەسەر رۆڵی زانكۆكانیش سەرۆكوەزیرانی عێراق رایگەیاند كە پێویستە زانكۆكان لەناو خەڵكدا بن و لەگەڵ واقیعی كۆمەڵگەدا بژین و هەوڵبدەن كاری خۆبەخشی بكەن بۆ ئەوەی بتوانن ڕۆڵیان هەبێت لە بەرەوپێشبردنی كۆمەڵگاكاندا و داواشی لە زانكۆكان كرد كە توێژینەوە لەبارەی كێشە قوڵەكانی كۆمەڵگاوە بكەن لە هەموو بوارەكاندا.